ჩვენთვის პრინციპულად მნიშვნელოვანია, რომ მან არცერთი საჯარო თანამდებობა არ დაიკავოს.- ამის შესახებ პარტია “ქართული ოცნების” აღმასრულებელმა მდივანმა ირაკლი კობახიძემ “ღამის კურიერი”-ს ეთერში სტუმრობისას განაცხადა და გამოეხმაურა უკრაინის ვიცე-პრემიერად, მიხეილ სააკაშვილის შესაძლო დანიშვნას.
“ნებისმიერი საჯარო თანამდებობა, იქნება ეს ვიცე-პრემიერი თუ სხვა, ნებისმიერ ასეთ თანამდებობაზე დანიშვნა ჩვენი მხრიდან ბუნებრივია განხილული იქნება, როგორც არამეგობრული ნაბიჯი. მიხეილ სააკაშვილი საქართველოს კანონმდებლობის თანახმად არის მსჯავრდებული არაერთ მძიმე დანაშაულში. ეს ბუნებრივია იცის უკრაინის ხელისუფლებამ და ჩვენ ძალიან დიდი იმედი გვაქვს, რომ ეს არამეგობრული ნაბიჯი არ გადაიდგმება.
რაც შეეხება მეგობრობას ხალხსა და ქვეყნებს შორის, ამას ძალიან მყარი საუკუნოვანი ფესვები აქვს და ამას ვერავითარი გადაწყვეტილებით ვერანაირი საფრთხე ვერ შეექმნება, თუმცა ხელისუფლებებს შორის დამოკიდებულება უნდა იყოს მკაფიოდ განსაზღვრული და ის მეგობრულ პრინციპებს უნდა ეფუძნებოდეს. ერთადერთი ჩვენი თხოვნა, რაც არის ჩვენი უკრაინელი პარტნიორების მიმართ არის სწორედ ეს, რომ იყოს მეგობრობა და მეგობრობა იყოს ორმხრივი ხელისუფლებებს შორის“, – განაცხადა ირაკლი კობახიძემ.