დეკანოზი – როგორ უნდა გაბედოს მონასტრის წინამძღვარმა ჯერ ავტომატის ქონა და შემდეგ ბანდიტივით ტრასაზე ჩასაფრება და ადამიანისთვის სროლა?

დეკანოზი თამაზ ლომიძე ყინწვისის მონასტრის წინამძღვრის დაკავებას ეხმაურება.
„რამდენიმე თვის წინ, როცა ჩვენი ეკლესიის სიყვარულის გამო გამოვთქვი აზრი, რომ დამღუპველია ნებისმიერი ხელისუფლების მხრიდან ეკლესიის მიმართ უაზრო და უკონტროლო პრივილეგიები, ზოგიერთმა ბრალი დამდო, შენ ჩვენი ეკლესიისთვის ცუდი და მისი დევნა გინდაო. ახლა გეკითხებით, როგორ უნდა გაბედოს მონასტრის წინამძღვარმა ჯერ ავტომატის ქონა და შემდეგ – ბანდიტივით ტრასაზე ჩასაფრება და ადამიანისთვის სროლა? ან საერთოდ რატომ უნდა იყოს ასეთი ხალხი მონასტრის წინამძღვრად და ეპისკოპოსის პრივილეგირებულ “შვილობილად”? იმიტომ, რომ ბევრმა სწორედ ეს პრივილეგია და ხელშეუხებლობა იყნოსა ეკლესიაში, თბილად მოკალათდა, არც მისი ძველი ცოდვილი ცხოვრება დათმო და ავტომატებიც თან მოიტანა.
ამიტომ, არასოდეს და არავითარ შემთხვევაში არ უნდა იყოს სასულიერო წოდება პრივილეგია კანონის წინაშე. პირიქით, სასულიერო პირმა ყველაზე მკაცრად და პირნათლად უნდა დაიცვას კანონი.
უსაზღვროდ სამწუხაროა, რომ, სწორედ ასეთი შემთხვევების გამო, მთელს ეკლესიასა და ბევრ წესიერ სასულიერო პირს ეცხება ჩირქი“, – წერს დეკანოზი თამაზ ლომიძე.

ცნობისთვის, ყინწვისის მონასტრის წინამძღვარი განზრახ მკვლელობის მცდელობისა და ცეცხლსასროლი იარაღის უკანონო შეძენა-შენახვა-ტარების ბრალდებით დააკავეს.
„გამოძიებით დგინდება, რომ ბრალდებულმა გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა“, – წერია შსს-ს განცხადებაში.