საპარლამენტო უმცირესობის დეპუტატი მიხეილ მაჭავარიანი პარტია „ნაციონალური მოძრაობიდან“ გიორგი ვაშაძის წასვლის ფაქტს ეხმაურება და აცხადებს, რომ ვაშაძე სიის ათეულში ვერ მოხვდა და ის, დაახლოებით 2 წელია, სულ ცდილობდა, ადგილი დაემკვიდრებინა, ოღონდ არა იმ თამაშის წესებით რომელიც არსებობს.
ამ თემაზე მაჭავარიანი გაზეთ „ალიას“ კორესპონდენტს ესაუბრა.
„გაიხსენეთ თბილისში მერობის კანდიდატის პრაიმერისი. მან უარი თქვა პრაიმერისზე, ვინაიდან წაგების შეეშინდა. გაიხსენეთ მისი მონაწილეობა პარტიის აღმასრულებელი მდივნის არჩევაში. მოკლედ, არანაირი გარანტირებული ადგილი არც ვაშაძეს და არც მაჭავარიანს სიაში არ აქვთ. ახლა დგება სია, ჩვენ მარტო იმ ადამიანებზე შევთანხმდით, რომელთაც აქვთ გამოცდილება, მაგრამ პოლიტიკისთვის ახლები არიან და ამიტომ ესეც ტყუილი ბრალდებაა, რომ მას ჰქონდა გარანტირებული ადგილი სიაში. ისიც ტყუილია, რაც ბატონმა ვაშაძემ თქვა, არანაირი პარტიის განახლების გეგმა მას არ მოუტანია, არსად არ განხილულა ეს ყველაფერი, ამიტომ, როცა ის საუბრობს ტყუილებით, რა უნდა ვუპასუხო?! რაც შეეხება ივანიშვილს, მისი კრიტიკა ახალი არ არის, მაგრამ ვაშაძის ქცევა, გამოეყოს „ნაციონალურ მოძრაობას“ და მუდმივად აკრიტიკოს ყოფილი გუნდი, ამით ზიანი მიაყენოს, ეს არის სწორედ ბიძინა ივანიშვილის ინტერესებში. ჩვენ გვაქვს კონკრეტული ეჭვები, ვინ დგას ამ ყველაფრის უკან და მოგვიანებით დავასახელებთ. იმიტომ რომ ის იყო დაჭმა! სწორედ განახლების საორგანიზაციო საკითხებში მდივანი და რეალურად არაფერი გაუკეთებია, მას არასამთავრობო ორგანიზაცია ჰქონდა შექმნილი, სადაც საკმაოდ დიდი თანხები იყო მობილიზებული.
მე როგორც ვიცი, პარტიის ლიდერები, იგივე აღმასრულებელი მდივანი რატიანი, იგივე თბილისის ორგანიზაციის თავმჯდომარე მელია, სთავაზობდნენ მას ამ ხალხის ინტეგრირებას პარტიაში. კონკრეტულად მელია სთავაზობდა, რომ მთლიანად ეს გუნდი გადასულიყო თბილისის ორგანიზაციაში და აღმასრულებელ, მმართველობით რგოლშიც მიეღოთ მონაწილეობა. იგივე ბანაკებს რომ აკეთებდა, მაშინ იყო საუბარი, რომ ეს ბანაკები კი არ ყოფილიყო უბრალოდ საზაფხულო ბანაკები, არამედ გამოეყენებინა პარტიას თავის კონკრეტული ტრენინგებისთვის, ეს ადამიანი მუდმივად იკავებდა თავს. მის დასახელებას ათეულში არავინ აპირებდა, ვინაიდან, ფაქტობრივად, ბოლო 4 თვის განმავლობაში ის პარტიაში სულ 15-ჯერ თუ იქნება ნამყოფი. უკრაინაში იყო ძირითადად, ჩამოდიოდა საპარლამენტო კვირაში და თუ თბილისში იყო, მიდიოდა თავის არასამთავრობოში.
ისევ გიმეორებთ, წარსულია უკვე ჩემთვის ვაშაძე და ეგ კაცი არის ჩემთვის ცრუპენტელა, მატყუარა ადამიანი და მე ვერ გამოვიტან ჩვენს შიდა სამზარეულოს გარეთ, არც სურვილი არ მაქვს და ვერც საჭიროებას ვხედავ, ჩვენ იმ პრობლემებზე უნდა ვისაუბროთ, რაც ახლა მოსახლეობას აწუხებს. ვაშაძის ყოველი სიტყვის კომენტირებას არ ვაპირებ, რაც ვთქვი, ესეც ზედმეტი ყო, მე თუ მკითხავთ“ – განაცხადა მაჭავარიანმა.