„როგორც ჩანს, შალვა ნათელაშვილს „ქართული ოცნების“ ტროლებმა facebook-ი გაუტეხეს“, – ასე გამოეხმაურა „ნაციონალური მოძრაობის“ ერთ-ერთი წევრი, რომან გოცირიძე შალვა ნათელაშვილის ფეისბუქსტატუსს, სადაც ის საარჩევნო კოდექსში გენდერულ კვოტირებაზე წერს.
„ქართული ოცნება“ ყველაფრის მკადრებელია და თავიანთი ტროლებით და ბოტებით შეძვრნენ შალვას facebook-ში და ეს სტატუსი დაუწერეს. მის სტატუსს წავიკითხავ, გეტყვით, არ ვიცი, ნამდვილია თუ არა“, – განაცხადა რომან გოცირიძემ.
საარჩევნო კოდექსში შესატანი ცვლილებები ითვალისწინებს გენდერული კვოტირების ახალ პრინციპს, რომლის მიხედვითაც პარტიულ პროპორციულ სიებში ყოველი მეოთხე განსხვავებული სქესის უნდა იყოს.
შალვა ნათელაშვილის განცხადებით, „ეს არის წარმოუდგენელი შეურაცხყოფა, დისკრედიტაცია და სეგრეგაცია იმ ქვეყნის საქალეთისა, სადაც მეთორმეტე საუკუნეში ქალი გახლდათ სახელმწიფოს მეთაური – ეს დეპუტატთა არჩევნებია თუ სასქესო ორგანოების არჩევნები“.