მცხეთის რაიონულ სასამართლოში გიორგი შაქარაშვილის საქმეზე მოწმის სახით დიჯეი კონსტანტინე ღიბრაძე დაიკითხება. სასამართლოში შესვლამდე ღიბრაძეს ჟურნალისტებთან კომენტარი არ გაუკეთებია.
არასრულწლოვან გ.მ.-ს ადვოკატის როსტომ კერესელიძის ინფორმაციით, კოკო ღიბრაძეს მისი დაცვის ქვეშ მყოფთან დაკავშირებით გამოძიებისთვის ურთიერთსაწინააღმდეგო ჩვენებები აქვს მიცემული.
„კოკო ღიბრაძე არის ერთ-ერთი საკვანძო ფიგურა ამ საქმეში, მითუმეტეს, ჩემი დაცვის ქვეშ მყოფთან დაკავშირებით. ურთიერთსაწინააღმდეგო ჩვენებები აქვს მიცემული, აშკარაა სამართალდამცავების ზეგავლენა მეორე ჩვენების მიცემის დროს. პირველ ჩვენებაში ჩემი დაცვის ქვეშ მყოფის შესახებ არ ლაპარაკობს არაფერს, შემდეგ კი პირდაპირ მიუთითებს, რომ მონაწილეობდა ჩხუბშიო. ეს ალბათ იყო პოლიციელების მხრიდან მითითება, რომ გამყარებულიყო მათ მიერ წარმოდგენილი პოზიცია ჩემი დაცვისქვეშ მყოფისა და ლ.შ.-ს მიმართ,” – აღნიშნა როსტომ კერესელიძემ.
ცნობისთვის, მცხეთის რაიონულ სასამართლოში, დღეს გიორგი შაქარაშვილის გარდაცვალების საქმეში ბრალდებული არასრულწლოვნების პროცესი გაიმართება. წინა სასამართლო პროცესი დაწყებიდან მალევე გადაიდო, ამის მიზეზი კი ერთ-ერთი არასრულწლოვნის, ზ.ხ.-ს ჯანმრთელობის მდგომარეობის გაუარესება გახდა.