დღეს მცხეთის რაიონულ სასამართლოში გიორგი შაქარაშვილის საქმეზე მოწმის სახით დიჯეი კოკო ღიბრაძე უნდა დაეკითხათ, თუმცა სხდომა დაცვის მხარის მოთხოვნით გადაიდო.
მოწმე კოკო ღიბრაძე აცხადებს, რომ ბრალდებულები სიტუაციიდან გამოსავლის პოვნის მიზნით მოწმეებს დებენ ბრალს და საინფორმაციო ომს აწარმოებენ.
“რა თქმა უნდა, იმ ინფორმაციის მიწოდებას ვაპირებდი, რაც აქამდე მქონდა მიწოდებული საგამოძიებო ორგანოებისთვის და იგივეა, რაც პირველ და მეორე ჩვენებაში მიწერია.
ბრალდებულების ადვოკატები უბრალოდ თითს იშვერენ ჩვენკენ, ვინაიდან არცერთ კითხვაზე არ აქვთ მათ პასუხი. უბრალოდ, ცდილობენ სიტუაციის არევას და სიტუაციიდან დაძრომას.
რაც შეეხება იმ საინფორმაციო ომს, რასაც კონკრეტული პიროვნებები და ადვოკატები აწარმოებენ, ვინაიდან ჩვენ ხშირად არ ვთანამშრომლობთ მედიასთან, ეს იმას არ ნიშნავს, რომ სიმართლის დადგენა არ გვინდა, ან არ გვინდა დაისაჯონ ის პირები, ვინც გიორგის მკვლელობაში მონაწილეობენ. ეს ყველაფერი გამოწვეულია იქიდან, რომ მედიის საშუალებითაც ხდება ამით მანიპულირება და ჩემთვის პირადად, როგორც მოწმისთვის მიუღებელია ეს,” – განაცხადა კოკო ღიბრაძემ.