„ქართულმა საზოგადოებამ კარგად ნახა, რომ სოფელ ნახედურში იყო რამდენიმე ეტაპიანი პროვოკაცია „ნაციონალური მოძრაობის“ მხრიდან და მას შემდეგ, რაც ვერც ერთ ჯერზე ვერ მოახერხეს ამ პროვოკაციაში ჩაერთოთ „ქართული ოცნების“ აქტივისტები, გადავიდნენ ფიზიკურ ძალადობაზე, მათ შორის ხელკეტებითა და ქვებით“, – განაცხადა ფრაქცია „ქართული ოცნების“ თავმჯდომარემ, რატი იონათამიშვილმა.
მისივე თქმით, ამ ფაქტს მოჰყვება მყისიერი რეაგირება, მათ შორის, საერთაშორისო პარტნიორების ინფორმირება.
„ჩვენ მივმართავთ ჩვენს საერთაშორისო პარტნიორებს და მისებს, რომლებიც არიან დამკვირვებლებიც წინასაარჩევნო პროცესში, რათა მოხდეს მსგავსი საკითხების შეფასება. ჩვენ მათ აუცილებლად მივაწვდით ამ საკითხზე ამომწურავ ინფორმაციას. ჩვენ ადრეც ვპროგნოზირებდით, რომ მიუხედავად იმისია, რომ ყველაფერს ვაკეთებთ იმისათვის, რომ არჩევნები სამართლიან და მშვიდ გარემოში ჩატარდეს, იმ ოპოზიციის მხრიდან, რომლის რეიტინგიც ნულთან მიახლოებულია, იქნებოდა გარკვეული პროვოკაციები“, – აღნიშნა ფრაქცია „ქართული ოცნების“ თავმჯდომარემ.
რატი იონათამიშვილის შეფასებით, როგორც ჩანს, ოპოზიციას არ აქვს არანაირი პროაქტიური თემა, პოლიტიკური დღის წესრიგი, რომლის მეშვეობითაც შეუძლიათ საზოგადოების წინაშე წარსდგნენ და ისაუბრონ.
„ერთადერთი გზა, რაც გონიათ და თვლიან, რომ შედეგის მომტანი იქნება მათთვის, არის პროვოკაცია, ძალადობის წახალისება, მაგრამ ჩვენის მხრიდან და ჩვენი საერთაშორისო პარტნიორების მხარდაჭერით, დარწმუნებული ვართ, რომ არაფერი დაემუქრება არჩევნების მშვიდ გარემოში ჩატარებას და ჩვენ ამ საპარლამენტო არჩევნებზე დავიცავთ დემოკრატიულობისა და სამართლიანობის მაღალ სტანდარტს“, – აღნიშნა ფრაქცია „ქართული ოცნების“ თავმჯდომარემ.