გუშინ, როცა დაიწყეს ხალხის დაბოლება, ივანიშვილმა ფული ერთი ჯიბიდან მეორეში ჩაიდოო, წამოვწიე (ფეისბუკით, ტელევიზიით) იპოდრომის პრეისტორია, თუ როგორ და ვისზე გაასხვისეს 2007 წელს, – წერს სოციალურ ქსელში ექსპერტი ამირან სალუქვაძე.
“როცა გავრცელდა ინფორმაციები, რომ ჯიბიდან ჯიბეში კი არ ჩაიდო, არამედ ჯერ წინა ხელისუფლებამ ჟოკეი-კლუბს მიჰყიდა, ხოლო ამ უკანასკნელისგან ბიძინა ივანიშვილმა შეიძინა, ახლა ორი ზღაპარი შემოაგდეს.
ზღაპარი პირველი.
თურმე მთლიანად არ გადაუცია მერიისთვის და 8 ჰექტარი კომერციული მიზნებისთვის დაიტოვაო. მასეც რომ ყოფილიყო, ვისი რა საქმეა? თუ 52 მლნ დოლარი დაუჯდა ეს მიწა, პლუს დიდძალი თანხა დაჯდება პარკის გაშენება, რა პრობლემას ხედავთ, რომ ცოტა მოგებაც ენახა?! თქვენს ქონებებს მიხედეთ, რომლებსაც ოცნება არ გედავებათ. თუმცა, ეს ინფორმაცია სიცრუე აღმოჩნდა და მთლიანი ტერიტორია გადმოუცია.
ზღაპარი მეორე. გიგი უგულავამ, ჩემი დამსახურებაა ივანიშვილმა რომ შეისყიდაო. დაავიწყდათ იმ წლებში მოსახლეობის პროტესტი. ზუსტად ამ პროტესტმა აიძულა მაშინდელი მერია უარი ეთქვა მათ ჩანაფიქრზე. ჩანაფიქრი კი ასეთი იყო: იპოდრომი ლისზე გადაჰქონდათ, იპოდრომი კი უნდა ჩაცემენტებულიყო, როგორც ჩააცემენტეს დანარჩენი მიმდებარე ტერიტორია, რასაც მოჰყვა უამრავი ნაძვის და სხვა ხე-მცენარის გაჩეხვა.
გუშინ კიდევ ერთ ზღაპარს ავრცელებდნენ. იპოდრომიდან მოგება ვერ ნახაო და ამიტომ აბრუნებსო. ხომ მოისმინეთ, ხომ არ ვიგონებ?
მართლა ბრბოდ გვთვლიან:
– ჯერ ერთი შეეძლო ეს უძრავი ქონება მერიისთვის თავის ფასში ან მოგებით მიეყიდა;
– მეორე, შეეძლო უბრალოდ გაეყიდა;
– თუ მოგება ვერ ნახა და ამიტომ დააბრუნა, ანუ თუ ფულზე, მოგებაზე ფიქრობდა, არ გამოუვიდა და მოიშორა, ზემოდან პარკის გასაშენებლად ათეულობით მილიონ ლარს რატომ ახარჯავს?
გაქვთ ამ კითხვებზე პასუხები?
52 მილიონი დოლარი კი არა, ეროვნულ ვალუტაში თქვით, 156 მილიონი ლარი, პლუს პარკის გაშენების დანახარჯები.
შკლიაროვი რომ აღარ გყავთ, საარჩევნოდ, დაგეტყოთ, თორემ გირჩევდათ კომენტარებისგან თავი შეიკავეთო.
პანდემიის დროს დეპუტატების ხელფასების 1/3 არ დადეთ, ჩვენ ქველმოქმედებას ვეწევითო. ვნახეთ ლაგოდეხში თქვენი ქველმოედება, მეორადების ფუთების დარიგება წინასაარჩევნოდ, რომელ ფაქტზეც რეაგირება არ მომისმენია. ბიუჯეტის და სხვისი ქონების ხარჯზე მილიონერებიც გყავთ, მილიარდელებიც, მაგ ჩასაცმელების დარიგებას, ერთი ნათურა თქვენც დაგეკიდათ ქალაქში?!
თქვენც გააკეთეთ პარკები, ბავშვთა ბაგები, სხვა საზოგადოებრივი ობიექტები, მხოლოდ ტელევიზიებს რომ ქმნით, სიამოვნებით მივიღებთ.
პარკი კი ასეთი იქნება, დატკბით”, – წერს სალუქვაძე.