თუ „ნაციონალური მოძრაობის“ კონკრეტულ წევრებს, რომლებმაც წლების წინ დიღმის ტყე-პარკში ტერიტორიები შეიძინეს, გული შესტკივათ თბილისზე, ქალაქში არსებულ ეკოლოგიურ მდგომარეობაზე, მათ შეუძლიათ საჩუქრად, სიმბოლურ ფასად – 1 ლარად გადასცენ ეს ტერიტორიები მუნიციპალიტეტს და ჩვენ ავიღებთ სრულ პასუხისმგებლობას, რომ ეს ტერიტორიები იქნება მოწესრიგებული, განახლებული და ქალაქში დამატებით კიდევ ერთი დასასვენებელი სივრცე გაჩნდება, – ამის შესახებ ტელეკომპანია „იმედის“ გადაცემაში „არენა“ თბილისის მერმა, „ქართული ოცნების“ გენერალურმა მდივანმა, კახა კალაძემ განაცხადა.
„წლების წინ დიღმის ტყე-პარკში გასხვისდა კონკრეტული ტერიტორიები, რათა მომავალში იქ გარკვეული სამშენებლო სამუშაოები ჩატარებულიყო. რა თქმა უნდა, დიღმის ტყე-პარკს ძალიან ბევრი გულშემატკივარი ჰყავს და ეს პირადად ჩემთვის და უამრავი ადამიანისთვის სერიოზულ პრობლემას წარმოადგენს. შესაბამისად, თუ „ნაციონალური მოძრაობის“ კონკრეტულ წევრებს გული შესტკივათ თბილისზე, ქალაქში არსებულ ეკოლოგიურ მდგომარეობაზე, მათ შეუძლიათ საჩუქრად, სიმბოლურ ფასად – 1 ლარად გადასცენ ეს ტერიტორიები მუნიციპალიტეტს და ჩვენ ავიღებთ სრულ პასუხისმგებლობას, რომ ეს ტერიტორიები იქნება მოწესრიგებული, განახლებული და ქალაქში დამატებით კიდევ ერთი დასასვენებელი სივრცე გაჩნდება. მათ ამ პროექტის განხორციელება არც ერთი თეთრი არ დაუჯდება, ხოლო ჩვენ თბილისელების სახით მათ მადლობას ვეტყვით“, – განაცხადა კალაძემ.
ყოფილი იპოდრომის ტერიტორიაზე ცენტრალური პარკი გაშენდება. საერთაშორისო საქველმოქმედო ფონდმა „ქართუმ“ თბილისის მუნიციპალიტეტს საკუთრებაში უსასყიდლოდ გადასცა ყოფილი იპოდრომის ტერიტორია, რომელიც კერძო მესაკუთრეებისგან გამოისყიდა.