ყველაფერს წყვეტს ჩვენი ქვეყნის მოსახლეობა და, რა თქმა უნდა, თითოეულ ადამიანზეა დამოკიდებული თუ რომელი კონკრეტული პარტია რა უპირატესობით და რა შემადგენლობით შევა მომდევნო პარლამენტში, – ამის შესახებ კახა კალაძემ „იმედის“ გადაცემაში „არენა“ განაცხადა. თბილისი მერის თქმით, პირადად მას არჩევნების შედეგებთან დაკავშირებით დადებითი განწყობა აქვს.
„გულწრფელად შემიძლია ვთქვა, რომ დღეს ერთადერთი პოლიტიკური პარტია, რომელიც სრულ საარჩევნო კამპანიას ატარებს ქვეყანაში, არის „ქართული ოცნება – დემოკრატიული საქართველო“. ერთადერთი პოლიტიკური ძალა, რომელსაც რეალურად აქვს იმის შესაძლებლობა, რომ შეინარჩუნოს მშვიდობა ქვეყნაში, რომ შეინარჩუნოს სიმშვიდე, სტაბილურობა და მოახერხოს ქვეყნის სწრაფი ეკონომიკური გავლენა, აღმშენებლობა და აღმავლობა, არის პარტია „ქართული ოცნება-დემოკრატიული საქართველო“. დარწმუნებული ვარ, ჩვენი ქვეყნის მოსახლეობის ძალიან დიდი ნაწილი, სხვათაშორის კვლევებითაც ნათლად ჩანს, რომ დღეს პარტია „ქართული ოცნება“ ისე იგებს არჩევნებს, რომ არავითარი კოალიციური მთავრობის საჭიროება არ არის“, – განაცხადა კალაძემ.
მან მმართველი გუნდის ოპონენტებზეც ისაუბრა და აღნიშნა, რომ ასპარეზზე ბევრი პოლიტიკური პარტიის წამოწევა უხარია.
„პოლიტიკური მრავალფეროვნება და პლურალიზმი, რომელიც გვაქვს დღეს, რა თქმა უნდა, არის მისასალმებელი და დემოკრატიული თვალსაზრისით წინ გადადგმული ნაბიჯი. ასევე უნდა გავითვალისწინოთ ის, რომ წლევანდელი არჩევნები ტარდება განსხვავებული საარჩევნო სისტემით ვიდრე წინა საპარლამენტო არჩევნები. არის მხოლოდ 30 მაჟორიტარული ოლქი. და ასევე შემდეგი ეტაპი არის ის, რომ 2024 წლიდან უკვე აბსოლუტურად განსხვავებული სისტემა იქნება, რომელიც უკვე კონსტიტუციით არის განსაზღვრული“, – აღნიშნა კალაძემ.