რეგიონული განვითარებისა და ინფრასტრუქტურის მინისტრის, მაია ცქიტიშვილის განცხადებით, მთავრობა კორონავირუსული ინფექციის გავრცელების შესაკავებლად სისტემურ შეზღუდვებს არ გეგმავს.
ცქიტიშვილის განმარტებით, საუბარია წერტილოვანი შეზღუდვების ფარგლებში, მობილობის შეზღუდვაზე იქ, სადაც ამის საჭიროება დადგება.
„როგორც აღვნიშნე, ჩვენ არ ვგეგმავთ სისტემურ შეზღუდვებს, არ ვგეგმავთ ისეთ შეზღუდვებს, რომელიც მთელი ქვეყნის მასშტაბით იქნება დაწესებული. ხედავთ, ბოლო პერიოდის განმავლობაში, ევროპის ქვეყნებში, ამერიკაში, სხვა განვითარებულ ქვეყნებშიც არის სხვადასხვა ტიპის შეზღუდვების დაწესების პრაქტიკა იმისდა მიხედვით, თუ რა ეპიდემიოლოგიური ფონია ამა თუ იმ რეგიონში.
სამწუხაროდ, იმის გათვალისწინებით, რომ ძალიან გაიზარდა პოლიტიკური პროცესის გათვალისწინებით მობილობა. დღეს უკვე გვაქვს მნიშვნელოვნად გაზრდილი ინფიცირებულთა რაოდენობა თბილისში, სამეგრელო-ზემო სვანეთში, კახეთშიც, გურიაშიც, თუ დააკვირდებით რიცხვებს, ინფიცირებულთა რაოდენობა იზრდება. ამიტომ, წერტილოვანი შეზღუდვების ფარგლებში, ძალიან მიზნობრივად, ეფექტური მიზეზშედეგობრივი შეზღუდვების დაწესებით, ჩვენ, რა თქმა უნდა, იძულებული ვიქნებით, რომ შევზღუდოთ მობილობა იქ, სადაც ამის საჭიროება დადგება. რა თქმა უნდა, ამ ნაწილში, შესაძლებელია ეს იყოს, როგორც ღამის საათებში გადაადგილების შეზღუდვა“, – განაცხადა მაია ცქიტიშვილმა.