იაგო ხვიჩია ცდილობს, იმაზე მეტი აიღოს თავის თავზე, ვიდრე მას შეუძლია, საკმაოდ შეუსრულებელი მისია დაისახა ოპოზიციის პარლამენტში შეყვანის- ზოგადად, როგორც მომლაპარაკებელი ოპოზიციასა და ხელისუფლებას შორის. ოპოზიციამ გააკეთა უკვე არჩევანი ფასილიტატორ ელჩებზე, ამიტომ, ბატონი იაგოს აქტიურობა ზედმეტი მგონია, – ამის შესახებ „სტრატეგია აღმაშენებლის“ წევრმა, სერგო ჩიხლაძემ განაცხადა.
ამასთან, ჩიხლაძე ამბობს, რომ „სტრატეგია აღმაშენებელი“ ხელისუფლებასთან მოლაპარაკებისა და შეთანხმების გარეშე პარლამენტში არ შევა.
,,ეს არის გაგრძელება მათი პროპაგანდის, რომ ოპოზიცია დაყოფილია დესტრუქციულ კონსტრუქციულ ნაწილებად და ბატონ ელისაშვილს კონსტრუქციულ ნაწილად მოიაზრებენ. ჩვენ კი საერთოდ არ მოვიაზრებთ ელისაშვილს ოპოზიციის ნაწილად. ეს მათი სამთავრობო პროპაგანდა, რომელსაც ე.წ. ზოგიერთი ოპოზიციური პარტია აყვა, მაგალითად, ელისაშვილი. სრული პასუხისმგებლობით ვამბობ, რომ „სტრატეგია აღმაშენებელი“ არ შევა პარლამენტში მოლაპარაკების და შეთანხმების მიღწევის გარეშე, ასევე დიდი ალბათობით, სხვა ოპოიციური პარტიებიც. ამაზე განცხადებაც გავაკეთეთ რამდენიმე დღის წინ.
რაც შეეხება მემორანდუმს, მემორანდუმი რაც ბატონ ალეკოს დააჭერინეს ხელში, ეს არის იმაზე უარესი ვარიანტი, ვიდრე მიმდინარეობდა მსჯელობა თუნდაც მეოთხე რაუნდზე- ეს არის გაუარესებული ვარიანტი. მაგალითად, კომოსიების შემადგენლობა, ასევე ცენტრალური საარჩევნო კომისიის თავმჯდომარის არჩევის პუნქტი და ა.შ.
ეს იმაზე ცუდი ვარიანტია, ვიდრე ოპოზიცია და ხელისუფლება ფასილიტატორი ელჩების საშუალებით თუნდაც მეოთხე რაუნდზე მსჯელობს. ვფიქრობ, ან გააზრებულად გააკეთა ელისაშვილმა ეს ან უბრალოდ შეატყუეს.
მანდატების გაუქმებამდე უფრო მეტი შანსი იყო, რაღაც შეთანხმება მომხდარიყო. რა თქმა უნდა, ორ თებერვლამდე ორი დღეა დარჩენილი და არანაირ მეხუთე რაუნდს არ ვვარაუდობთ. მოლაპარაკებების შესაძლებლობის ეს ფანჯარაც იხურება. აქედან გამომდინარე, ეს პასუხისმგებლობა ადევს ხელისუფლებას, რადგან მან არ გადმოდგა ნაბიჯი. არც ერთი წინადადებით ის არ მოსულა მოლაპარაკებებზე იმ საკითხებთან დაკავშირებით, რომელიც ჩვენ გვაინტერესებდა. ხელისუფლებას ამ კრიზისის ფონზე მოუწევს მაინც მოლაპარაკებაზე წასვლა ოპოზიციასთან. კარგი იყო და მეტი შანსი, დროულად მომხდარიყო ეს და დადებითი შედეგით მანდატების განხილვამდე. მანდატების ჩახსნის შემდეგ ჩვენ მზად ვიქნებით, რომ კონსტრუქციული დიალოგი ვაწარმოოთ. ხელისუფლებისგან განსხვავებით, ნებისმიერ მოცემულობაში ჩვენ მზად ვართ, დიალოგისთვის“, – განაცხადა სერგო ჩიხლაძემ.