ყოველდღიურ რეჟიმში გვაქვს კომუნიკაცია იუნესკო-ს მსოფლიო მემკვიდრეობის ცენტრთან. ველოდებით მათგან კონკრეტულ პირთა ჯგუფს, რომლებიც იქნებიან სახურავზე ორიენტირებული, რადგან დღეს სახურავს აქვს გარკვეული პრობლემები, – ამის შესახებ კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ანთიძემ განაცხადა.
მისივე განცხადებით, ტაძარი სრულად რესტავრირდა და სახურავის პრობლემა „იყო ძალიან უსიამოვნო“.
„რთულია, როდესაც სრული რეაბილიტაციის პროცესის შემდგომ, როცა გუმბათის ყელი და აბსოლუტურად ყველა დაზიანებული ადგილი გამაგრდა, ამ დროს კრამიტის გამო, ასეთი რამ ხდება. ამიტომ ჩვენ ველოდებით სპეციალისტებს, რომლებიც კონკრეტულ მიმართულებას მოგვცემენ, რა კუთხის კვლევები უნდა ჩატარდეს, როგორ უნდა იყოს გამოსასწორებელი ღონისძიებები და რა ვადაში. ეს არის ყველაზე მნიშვნელოვანი“ – აღნიშნა ნიკოლოზ ანთიძემ.
გელათის დროებითი გადახურვის სამუშაო დასრულების ეტაპზეა. სამუშაოს მწარმოებელი კომპანია „ბაგინეთი +” წარმომადგენელი ამბობს, რომ კვირის ბოლომდე სამუშაო დასრულდება.
უკვე შეიცვალა წყალშემკრები სისტემები, ქარის ზემოქმედების რისკის გასანეიტრალებლად დროებითი გადახურვის კონსტრუქციებზე მოეწყო დამცავი ელემენტები, ასევე ჩატარდა ტაძრის გარშემო სახურავიდან ნადენი წყლის არიდების სამუშაო.
კულტურული მემკვიდრეობის სააგენტო ექსპერტთა ფართო ჯგუფთან და საერთაშორისო სპეციალისტებით ჩართულობით, განსაზღვრავს 2021 წლის სამოქმედო გეგმას, რომლის ფარგლებშიც განხორციელდება კვლევითი და სახურავის პრობლემური უბნების გამოსასწორებელი ღონისძიებები.
ნიკა ანთიძე ამბობს, რომ იუნესკოს წარმომადგენლებს ადრეულ გაზაფხულზე ელოდებიან, იმისთვის რომ შემოწმდეს კრამიტის ხარისხი, განისაზღვროს მეთოდოლოგია, რითაც გელათის სახურავზე მოეწყობა დამატებითი დამცავი სისტემები წყლის ჩადინების ასარიდებლად, განსაზღვრულ არეალებზე მოეწყობა დამატებითი დამცავი მექანიზმები.
გელათში იმყოფება საპატრიარქოს ხუროთმოძღვრების საბჭოს ხელმძღვანელი მეუფე დავითი, რომელიც სააგენტოსთან ერთად, ტაძარში არსებულ ვითარებას გაეცნო. მისი თქმით, ის, რაც გელათის ირგვლივ ხდება, ყველას დანაშაული და პასუხისმგებლობაა.