პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის განცხადებით, უმრავლესობაში ერთხმადაა მიღებული გადაწყვეტილება, რომ ნიკა მელიასთვის აღკვეთის ღონისძიებად პატიმრობის გამოყენებასთან დაკავშირებით პროკურატურას თანხმობა ექნება.
მისივე თქმით, ნიკა მელიას საქმესთან დაკავშირებით ოპონენტების განცხადებები საფუძველს მოკლებულია.
ამასთან, სარჯველაძის შეფასებით, ოპონენტები ეცდებიან, მელიას საქმესთან დაკავშირებული გარემოებები გამოიყენონ, თუმცა „ეს მათ შორს მიმავალ გეგმებს ვერ დაალაგებინებს“.
„ერთხმადაა გადაწყვეტილება იმის თაობაზე, რომ პროკურატურას თანხმობა ექნება. ეს ბუნებრივიცაა და მისალოდნელიც. ვფიქრობ, ფუჭია მცდელობები, რომელსაც ოპონენტების მხრიდან ვაწყდებით. საზოგადოება ძალიან კარგად ხვდება, რომ ის, რაზეც ოპონენტები საუბრობენ, უსაფუძვლო და არასწორია. ერთადერთი პირი, ვის ხელშიც იყო ამ დრომდე გადაწყვეტილება პატიმრობის გამოყენება-არგამოყენებასთან დაკავშირებით, თავად ნიკანორ მელია იყო.
აქედან გამომდინარე, მსჯელობა იმასთან დაკავშირებით, რომ ხელისუფლებას სურს ნიკანორ მელიას დაპატიმრება, არის ტყული. სინამდვილეში, თავად ნიკანორ მელია ან მისი მეგობრები ცდილობენ, რომ მელია პატიმრობაში მოხვდეს, ასეთია რეალობა. აქედან გამომდინარე, ნებისმიერი სპეკულაცია არის საფუძველს მოკლებული. არ ვიცი, ვინმეს თუ ექნება მცდელობა, ეს ფაქტი გამოიყენოს გაზაფხულის გასაცხელებლად, მაგრამ, არა მგონია, კარგ საბაბად გამოდგეს. ვფიქრობ, ისინი ეცდებიან, გამოიყენონ ეს გარემოებები, თუმცა ეს მათ შორს მიმავალ გეგმებს ვერ დაალაგებინებს“, – აღნიშნა მიხეილ სარჯველაძემ.