გიორგი გახარიამ პრემიერის პოსტი დატოვა. მიზეზად გუნდში არსებული უთანხმოება დასახელდა, რომელიც, მისი თქმით, ნიკანორ მელიას შესაძლო დაპატიმრებას უკავშირდება. შექმნილ სიტუაციაში გახარიას ,,ნაციონალური მოძრაობის,, ლიდერის დაპატიმრება გაუმართლებლად მიაჩნია. რა სცენარით შეიძლება, განვითარდეს პოლიტიკური პროცესები ქვეყანაში – „კვირა“ პოლიტიკურ მიმომხილველს, ზაზა ფირალიშვილს ესაუბრა.
მე პირადად ნაკლებად მჯერა, რომ გახარიას გადადგომა მხოლოდ ნიკა მელიას საკითხთან დაკავშირებულ უთანხმოებას უკავშირდება. რეალურად, რა მიზეზი იყო, იყო ეს შიდა დაპირისპირებები, რაზეც ბევრს საუბრობდნენ თუ სხვა ფაქტორები, ამას მოგვიანებით გავიგებთ. ფაქტია, რომ აშკარა იყო დისონანსი გახარიასა და მის შიდაპარტიულ ოპონენტების ქცევაში. გახარიას გაწონასწორებული ქცევა და რიტორიკა აშკარად წინააღმდეგობაში იყო ,,ოცნების,, სხვა ლიდერებთან, ვისი რიტორიკაც აშკარად აღრმავებდა და ხელს უწყობდა პოლიტიკური კრიზის ფორმირებას ქვეყანაში. რას მოიტანს გახარიას გადადგომა? მე არ ვიცი, რამდენად შორს წავა გახარია. დარჩება ის ,,ქართული ოცნების,, გუნდში თუ ის დამოუკიდებელი ფიგურა გახდება. არც ესაა გამორიცხული. თუნდაც ის რომ გავიხსენოთ, რას დაგვპირდა ივანიშვილი, როცა ის პარტიული თანამდებობიდან წავიდა. მან თქვა, რომ ის ხელს შეუწყობს რეალური ოპოზიციის ჩამოყალიბებას და მოხარული იქნება ამის. შეიძლება, ამ სცენარის ნაწილად მივიჩნიოთ ის, რაც ახლა ხდება. ყველა შემთხვევაში, მე ვიტყოდი, რომ ეს პოზიტიური მომენტია. როგორც უნდა მომწონდეს ან არ მომწონდეს ერთი მხარე ან მეორე მხარე, ფაქტია, რომ ქართული პოლიტიკა ჩიხშია შესული. ქართული პოლიტიკა, ფაქტობრივად, ვერაფერს ღირებულს ვეღარ შობს. როცა უცხოელების რეაქციებს თვალს ვადევნებ, მე მცრხვენია. უცხოელებს ვერ გაუგიათ, რა ხდება. როგორც ერთმა, ასევე მეორე მხარემ სახელმწიფოებრივი იდეა გვერდზე გაწიეს და წინა პლანზე წამოწიეს ის, რაც არ შეესაბამება სახელმწიფოს არსს. გაუგებარია, ერთი ან მეორე მხარე როგორ აპირებს სახელმწიფოს ფორმირებას დიალოგის გარეშე.
-გახარიას გადადგომამ დიალოგისთვის სივრცე გააჩინა?
არ მინდა, რომ ძალიან ოპტიმისტური განცხადება გამომივიდეს, მაგრამ ყოველ შემთხვევაში პერსპექტივა იმისა, რომ ჩიხიდან გამოსავალი მოინიშნოს, გაჩნდა. ეს არის უკიდურესად მნიშვნელოვანი დღეს. წინააღმდეგ შემთხვევაში, ჩვენ დავრჩებით რთულ მდგომარეობაში. გაიხსენეთ NDA -ის კვლევები. რა აჩვენა ამ კვლევამ? ის, რომ მოსახლეობის აბსოლუტური უმრავლესობა გულგრილია როგორც ოპოზიციის, ისე, ხელისუფლების მიმართ.
-„ოცნების“ დარჩენილი გუნდის რიტორიკის თუ გათვალისწინებით, რას უნდა ველოდოთ, მოლაპარაკებები ოპოზიციასთან შესაძლებელია?
,,ოცნებაში,, არიან შედარებით დაბალანსებული ადამიანებიც. მაგალითად, ირაკლი ქადაგიშვილი, რომელიც სახელმწიფოებრივად მოაზროვნე ადამიანია. იგივე კალაძე, რომელიც ასევე დაბალანსებული და საკმაოდ საქმიანი ადამიანი და პოლიტიკოსია. მოკლედ, არის რამდენიმე ადამიანი – ისინი შეეცდებიან, რომ ამ ფაქტის ყველა შედეგი გაითვალისწინონ და დასკვნები გააკეთონ. თუმცა, ,,ოცნებაში,, არიან ხისტი პოლიტიკის მიმდევრებიც რომლებიც მთელი თავის პოლიტიკური ცხოვრების მთავარ შინაარსს ,,ნაციონალების,, დამარცხებაში ხედავენ. ასეთ სიტუაციაში ვინ ვის აჯობებს, ამის პროგნოზირება ძალიან რთულია. ,,ოცნებაში,, აუცილებლად წავა და უკვე მიმდინარეობს პროცესები, ანუ შიდაპარტიული ბრძოლა. ცუდი ის არის, რომ ოპოზიცია კვლავ იშვება ხელისუფლების წიაღში.
-ახლა, შეგვიძლია ვთქვათ, რომ რიგარეშე არჩევნების კონტურები მკაფიო გახდა?
ვერ გეტყვით. სწორედ ამ თემამ შეიძლება, გამოიწვიოს დიდი უთანხმოება “ოცნებაში”. მოკლედ, გახარიამ ძალიან სერიოზული ნაბიჯი გადადგა, თუმცა, არ ვიცი, რამდენად შორს წასვლისთვის არის მზად.
-თქვენ წეღან ივანიშვილი და მისი განცხადება ახსენეთ კონსტრუქციული და ქმედითი ოპოზიციის აუცილებლობის შესახებ. ივანიშვილისა და გახარიას ალიანსს ხომ არ ვიხილავთ?
თუ ეს მოხდა, ძალიან ცუდი იქნება. ამის ალბათობა სერიოზულია და ამ შემთხვევაში გარძელდება ყოვლისცოდნე და ყოვლისშემძლე ლიდერის ტრადიცია საქართველოში. ივანიშვილთან ურთიერთობას გახარია ვერ ასცდება, მაგრამ კარგი იქნება, თუ არ იქნება მასზე ისე დამოკიდებული, როგორც ახლა მთელი „ოცნებაა’’.