შინაგან საქმეთა სამინისტრო დეპუტატ გივი თარგამაძის მანქანის აფეთქების საქმეზე ჩატარებული საგამოძიებო მოქმედებების ფარგლებში ამოღებული სხვადასხვა ნივთმტკიცების შესახებ ინფორმაციას ასაჯაროებს.
როგორც შსს-ში გამართულ ბრიფინგზე აღინიშნა, დანაშაულთან დაკავშირებული იდენტიფიცირებული პირისა და მასთან კავშირში მყოფი სხვა პირების ბინებისა და ავტოფარეხის ჩხრეკისას სამართალდამცვებმა სხვადასხვა ნივთი ამოიღეს, მათ შორის ავტომატები, ხელყუმბარები, ვაზნები და გივი თარგამაძის საცხოვრებელი და სამუშაო ადგილების ნახაზები.
„საგამოძიებო მოქმედებების ფარგლებში თბილისის სხვადასხვა ტერიტორიაზე ერთდროულად განხორციელდა დანაშაულებრივ ფაქტთან დაკავშირებული იდენტიფიცირებული პირის და მათთან კავშირში მყოფი სხვა პირების ბინებისა და ავტოფარეხის ჩხრეკა. სამართალდამცველებმა ჩხრეკის შედეგად ამოიღეს: დაბეჭდილი ლიტერატურა, ასევე ხელნაწერი, სადაც აღწერილია ასაფეთქებელი ნივთიერებების დამზადების წესი. დისტანციურად ასაფეთქებელი ნივთიერების დასამზადებლად საჭირო ნივთიერებები, დისტანციული პულტები, ელექტროსადენები და სხვადასსდხვა დეტალი. დაზარალებული გივი თარგამაძის საცხოვრებელი და სამუშაო ადგილების გეგმა და ნახაზები. მოთეთრო ფერის ფხვნილი, ასაფეთქებელი ნივთიერება „ჰექსოგენი“. ორი მოწითალო ფერის შეკვრა ასაფეთქებელი ნივთიერება „ტროტილი“, ერთი მომწვანო ფერის შეკვრა ასაფეთქებელი ნივთიერება „ტროტილი“, მუყაოს სამი კოლოფი მათში არსებული სხვადასხვა ზომის ლითონის ფრაგმენტებით. „აკა 47“-ის მოდელის ერთი ავტომატი მაყუჩით. „აკს-უს“ მოდელის ერთი ავტომატი. იარაღის ოპტიკური სამიზნე მოწყობილობა, 6 ხელყუმბარა, 16 მჭიდი, 2112 ვაზნა, ლულის ქვეშა სასროლის 16 ყუმბარა, 3 ფალია და სხვა“, – განაცხადეს შსს-ში.