მოხდება თუ არა წელს ციტრუსის სუბსიდირება, ჯერჯერობით უცნობია.როგორც შესაბამისი კითხვის საპასუხოდ სოფლის მეურნეობის მინისტრმა ლევან დავითაშვილმა ჟურნალისტებს განუცხადა, ამ ეტაპზე სიტუაციის შესწავლა მიმდინარეობს.
„ზოგადად, ჩვენ ფასის სუბსიდირებას გრძელვადიან პერსპექტივაში არ ვუჭერთ მხარს. თუმცა, მოსავლის დაბინავებისთვის საჭიროა ღირებულებათა ჯაჭვის იმ ელემენტების გაძლიერება, რომელიც მოგვცემს საშუალებას, რომ სახელმწიფოს ჩარევის გარეშე მოხდეს პროდუქციის დაბინავება და მოხდეს ისე, რომ მევენახეების, ხილის მწარმოებლების თუ სხვა ფერმერების მოტივაცია იყოს შენარჩუნებული. იცით, რომ არსებობს ისეთი პროდუქტები, რომლებიც ძალიან მგრძნობიარეა მსოფლიო ბაზარზე მიმდინარე ტენდენციების მიმართ.
რაც შეეხება სუბსიიდიის ნაწილს, ჩვენ ახლა ვსწავლობთ კონცენტრანტის საერთაშორისო ფასებს. წინა წელსაც იყო საუბარი მხოლოდ ინდუსტრიულად გადასამუშავებელ პროდუქტზე, როდესაც ჩვენ დავასტიმულირეთ, რათა არ ყოფილიყო მოსავლის გადაყრა და მომხდარიყო საექსპორტოდ განკუთვნილი წარმოების ხელშეწყობა. ჩვენ სულ მოკლე ხანში მოგახსენებთ, თუ როგორი კონიუნქტურა გვექნება საერთაშორისო ბაზარზე. დღეს ვერ გეუბნებით, იმიტომ რომ ჩვენ ვაკეთებთ შესწავლას. სეზონი ჯერ არ დაწყებულა. ჩვენ დღესაც გვაქვს სამუშაო შეხვედრა აჭარის სოფლის მეურნეობის მინისტრთან. მუდმივ რეჟიმში ვსწავლობთ სიტუაციას და ჩვენი გადაწყვეტილება იქნება იმის ადეკვატური, რა სიტუაციაც იქნება ბაზარზე“, – განაცხადა ლევან დავითაშვილმა.