სამშენებლო კომპანია „დაგი” იწყებს ვანის არქეოლოგიური მუზეუმის სამშენებლო სამუშაოებს. პროექტის მიხედვით, აშენდება ოთხსართულიანი თანამედროვე სამუზეუმო სტანდარტის შენობა. საგამოფენო სივრცის გარდა იგეგმება საგანმანათლებლო და საზოგადოებრივი ზონების მოწყობა. მუზეუმს ექნება კაფე და სამუზეუმო მაღაზია. შენობა ადაპტირებული იქნება შეზღუდული შესაძლებლობის მქონე პირთათვის.
აღნიშნულს საპარლამენტო უმრავლესობის წევრი დათო ლორთქიფანიძე ეხმაურება:
“ეს არის უსერიოზულესი პროექტი. ჯამში 14.5 მილიონიანი ინვესტიცია განხორციელდება. 2016 წლის მაისში დავაანონსეთ სტუმრების (კულტურის მინისტრი მიხეილ გიორგაძე, ინფრასტრუქტურის მინისტრის პირველი მოადგილე ილია დარჩიაშვილი, მუნიციპალური განვითარების ფონდის ხელმძღვანელი ჯუანშერ ბურჭულაძე, ეროვნული მუზეუმის გენერალური დირექტორი დავით ლორთქიფანიძე, მსოფლიო ბანკის საქართველოს მისიის ხელმძღვანელი, იმერეთის გუბერნიის და ვანის მუნიციპალიტეტის საკრებულოსა და გამგეობის ხელმძღვანელების) თანდასწრებით და მიხარია რომ მოკრძალებული წვლილი (3 წლიანი ბრძოლისა და ხელისუფლების თანადგომისა) მაქვს ამ ეროვნულ და საშვილთაშვილო საქმეში. ჩვენი რაიონის, ვანის არქეოლოგიური მუზეუმი იქნება ევროპაში და არა მარტო ევროპაში გამორჩეული სამუზეუმო კომპლექსი. წარმატებები…”, – წერს ლორთქიფანიძე.