ცნობილი ქართველი ბიზნესმენი ბადრი პატარკაციშვილი 1955 წლის 31 ოქტომბერს თბილისში დაიბადა.
დაამთავრა საქართველოს პოლიტექნიკური ინსტიტუტი. იყო თბილისის მაუდ-კამვოლის კომბინატ „საბჭოთა საქართველოს” თანამშრომელი, შემდეგში ამავე კომბინატის დირექტორის მოადგილე.
1990 წელს იყო „ლოგოვაზის” კავკასიის რეგიონალური წარმომადგენლობის დირექტორი, 1992-93 წწ.-ში გენერალური დირექტორის მოადგილე და პირველი მოადგილე 1994 წელს. ასოციაცია „როსიისკიე ავტომობილნიე დილერის” ვიცე-პრეზიდენტი (1994-95). იყო რუსეთის საზოგადოებრივი ტელევიზიის (ОРТВ) გენერალური დირექტორის მოადგილე და 1996-2001 წწ.-ში გაერთიანებული ბანკის (რუსეთი) დირექტორთა საბჭოს თავმჯდომარე.
2001 წელს რუსული ტელეკომპანია „ТВ-6″-ის გენერალური დირექტორი და დირექტორთა საბჭოს თავმჯდომარე.
ბადრი პატარკაციშვილი 2001 წლიდან მოღვაწეობდა საქართველოში. გახლდათ ჰოლდინგ სს „ი-მედიას” დამფუძნებელი და ინვესტორთა ჯგუფის ხელმძღვანელი. საქართველოს ოლიმპიური ფონდის დამფუძნებელი და 2002-2007 წლებში საქართველოს ოლიმპიური კომიტეტის პრეზიდენტი. „ბადრი პატარკაციშვილის საქველმოქმედო ფონდის” დამფუძნებელი.