“შეხვედრა შედგა თვითონ გიორგის მოთხოვნით, რამდენჯერმე განხორციელდა ზარი ჩემს ტელეფონზე. შეხვედრები მქონდა მთელი დღის განმავლობაში, ვერ ვუპასუხე, რამდენიმე გამოტოვებული ზარი იყო და დილით მთხოვა შეხვედრა, – ამის შესახებ თბილისის მერმა კახა კალაძემ რუსთავი 2-ის “ღამის კურიერში” განაცხადა.
ჟურნალისტის კითხვაზე, მართალია თუ არა ფაქტი, როგორც ეს “ქართული ოცნების” თავმჯდომარემ განაცხადა, რომ გიორგი გახარიამ მას თანხის სანაცვლოდ კანდიდატურის მოხსნა შესთავაზა, კახა კალაძემ უპასუხა, რომ პირადად მასთან ეს საუბარი არ ყოფილა. თუმცა, მერმა აღნიშნა, რომ პარტიის თავმჯდომარე არ ტყუის.
“ვიმყოფებოდი მერიაში, სადაც მთავრობის სხდომა უნდა გამართულიყო და ვუთხარი, რომ თუ სურვილი ჰქონდა, შეიძლებოდა მერიაში ჩატარებულიყო ეს შეხვედრა და მართლაც მოვიდა. თვითონ მითხრა, სადაც ჩათვლი საჭიროდ, მოვალო
“იყო საუბარი, რომ ის აყენებდა თავის კანდიდატურას და უნდოდა ეს გაეზიარებინა ჩემთვის, ეს ყველაფერი შესაძლებელი იყო ტელეფონითაც გაკეთებულიყო, ამიტომ ეს იყო მიზეზი ჩემი განცხადებისა, როდესაც ვთქვი, რომ ვერ გავიგე შეხვედრის მიზეზი რა იყო, თუმცა, საუბარი იყო მხოლოდ და მხოლოდ ამაზე.
მე, რა თქმა უნდა, ვუთხარი, რომ არანაირი პრობლემა არ მაქვს, მას შეუძლია იმოქმედოს, როგორც მიიჩნევს საჭიროდ და დანარჩენი ყველაფერი თბილისის მოსახლეობაზეა დამოკიდებული, ძალიან მალე გამოჩნდება ყველაფერი,”- განაცხადა კახა კალაძემ.