ამომრჩეველს რომ ახსოვდეს, ის სისხლიანი ძალა, ამიტომაა იმ ბანერებზე სისხლი, – ამის შესახებ ბიზნესმენმა მიხეილ გაბრიაძემ „ქრონიკაში“ სატელეფონო ჩართვისას განაცხადა.
მისი თქმით, ხელშეკრულება კომპანია „ალმასთან“ მან გააფორმა და ბილბორდებზე ოპოზიციის საწინააღმდეგო, ე.წ. სისხლიანი ბანერების გაკვრა მან დააფინანსა. იგი აცხადებს, რომ აქვს პირადი, უარყოფითი დამოკიდებულება „ნაციონალური მოძრაობის“ მიმართ და აღნიშნული გადაწყვეტილებაც ამიტომ მიიღო.
„მე მაქვს გადახდის ქვითარი. ეს ჩემი და ჩემი მეგობრების ინიციატივა იყო. მინდა შევახსენო ყველას, ვინც მივა საარჩევნო უბანზე და მიიღებს გადაწყვეტილებას, ვის მისცეს ხმა, რომ ახსოვდეს, ის სისხლიანი ძალა, ამიტომაა იმ ბანერებზე სისხლი. ეს სისხლიანი ძალა არასდროს უნდა დაბრუნდეს. როგორც საუბრობენ, არ არის გადახდილი კოლოსალური თანხა. მათ პოლიტიკაში მობრუნებას, ამ თანხის გადახდა ჯობია. მერე ძალიან ბევრს დაკარგავს საქართველო იმათი მობრუნებით“, – განაცხადა გაბრიაძემ.