ადვოკატი გელა მამუკაშვილი სოციალურ ქსელში პოსტს აქვეყნებს.
“რამდენიმე კითხვას დავუსვამდი ევროკავშირის და აშშ-ის ელჩებს, კომისრებსა და ემისრებს…არ გრცხვენიათ, დისკომფორტს მაინც არ განიცდით, როდესაც კრიმინალს, იაფფასიან პროვოკატორს და მდაბიო ხულიგანს, სახელად ნიკანორ მელია, შეხვედრებს უწყობთ, ხელს ართმევთ, ესაუბრებით, უღიმით და მის გვერდით სერიოზულ თემებზე მსჯელობთ?! პატარა, მცირედი უხერხულობის განცდა მაინც არ გეუფლებათ ქართველი ხალხის მიმართ, ამ გაქსუებული ავაზაკის გამო თავი რომ გამოიდეთ და პერსონალურად მისთვის ამნისტიის კანონის მიღება მოგვახვიეთ თავს?! თქვენი მაამებლური დამოკიდებულება და არაპირდაპირი წაქეზება რომ არ ყოფილიყო, გაბედავდა ეს მხდალი არსება სახელმწიფოს წინააღმდეგ ამბოხების ორგანიზებას ჯერ პარლამენტის შენობის წინ, მოგვიანებით კი პარტიის ოფისს გადააქცევდა ამბოხებულთა ბასტიონად?! ნუთუ ისეთი მიამიტები ხართ, რომ ვერ ხვდებით, ამგვარი მიდგომებით საქართველოში აღვივებთ ანტიდასავლურ განწყობებს, ქართველი ხალხის თვალში ეწევით თქვენი ქვეყნების და იმ ღირებულებების დისკრედიტაციას, რაზეც დგას თანამედროვე დასავლური ცივილიზაცია და რომლისკენაც ჯერ კიდევ, ხაზს ვუსვამ, ჯ ე რ კ ი დ ე ვ მიისწრაფვის ქართველი ხალხი?! გავიგეთ ბატონო, ვხვდებით, რომ ფინანსურად გვეხმარებით. იმასაც ვხედავთ, რომ ჩვენი ოკუპირებული ტერიტორიების არაღიარების საკითხში სოლიდარულები ხართ, მაგრამ ამის სანაცვლოდ რა მოთხოვნებს გვიყენებთ, რა ღირებულებებს გვინერგავთ, რა ცხოვრების წესს გვახვევთ თავზე?! თანამედროვე დასავლური ცივილიზაცია ეყრდნობა ადამიანების თანასწორობას და თანაბარი შესაძლებლობების უზრუნველყოფის ღირებულებებს. აღნიშნული კი გულისხმობს ყველა ადამიანის, ნებისმიერი სუბიექტის თანაბარ პასუხისმგებლობას და თანასწორობას კანონის მოთხოვნების მიმართ. კანონის უზენაესობის პრინციპი საკუთარ თავში მოიცავს ს ა ყ ო ვ ე ლ თ ა ო ბ ა ს, ანუ მის მოთხოვნათა გავრცელებას ყველა პირზე თანაბრად, მიუხედავად სტატუსისა და სოციალური მდგომარეობისა. ვიცით, რომ თქვენი სახელმწიფოები მოცემულ პრინციპებს ერთგულებენ. ხელს თუ არ შეგვიწყობთ და არ დაგვეხმარებით, ხელს მაინც ნუ შეგვიშლით, რომ მოგბაძოთ და იგივე პრინციპები ჩვენს ქვეყანაში დავნერგოთ. ჩვენც გვინდა, ბატონო, ძლიერ და გამართულ ქვეყანაში ცხოვრება, არავიზე ნაკლები ერი ჩვენ არ ვართ.”