“გამოძიება დაადგენს, რა იყო კანონის ფარგლებში განხორციელებული შესაძლო მოსმენები და ამის შემდეგ ყველა კითხვას გაეცემა პასუხი”

ჩვენ გვყავს ძალიან ღირსეული სახელმწიფო უსაფრთხოების სამსახურის ხელმძღვანელი, ბატონი გრიგოლ ლილუაშვილი, მინდა, სახელმწიფო უსაფრთხოების სამსახურის თითოეულ თანამშრომელს მადლობა ვუთხრა პატრიოტიზმისა და ჩვენი ქვეყნისადმი სამსახურისთვის, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებთან კომენტარში განაცხადა.

„მინდა, ყველას მოგიწოდოთ, როდესაც საქმე ეხება ისეთ მნიშვნელოვან ინსტიტუტს, როგორიცაა სახელმწიფო უსაფრთხოების სამსახური და ის თანამშრომლები, რომლებიც 24 საათის განმავლობაში ემსახურებიან ქვეყანას და მოსახლეობის უსაფრთხოებასა და სიმშვიდეს, მათ ყველამ პატივი უნდა სცეს და მადლობა გადაუხადოს.

ბუნებრივია, გამოძიება დაადგენს, მოახდენს იდენტიფიცირებას, რა იყო აქედან, შესაძლოა, კანონის ფარგლებში განხორციელებული მოსმენები, რა არის ფაბრიკაცია და ამის შემდეგ ყველა კითხვას გაეცემა პასუხი“, – განაცხადა პრემიერ-მინისტრმა.