“ჩამოსვლის შემთხვევაში, სააკაშვილი მყისიერად იქნება დაკავებული და შესაბამის პენიტენციურ სისტემაში გადაყვანილი”

ჩამოსვლის შემთხვევაში, მიხეილ სააკაშვილი მყისიერად იქნება დაკავებული და შესაბამის პენიტენციურ სისტემაში გადაყვანილი, – ამის შესახებ ფრაქცია „ქართული ოცნების“ წევრმა გივი მიქანაძემ ჟურნალისტებთან საუბრისას განაცხადა.

მისი თქმით, დანაშაულისთვის ყველამ პასუხი უნდა აგოს.

„ნებისმიერი ადამიანი, ვის მიმართაც დამდგარია კანონიერი სასამართლო განაჩენი, უნდა წარსდგეს მართლმსაჯულების წინაშე და პასუხი აგოს – ეს არის კანონის უზენაესობის უმთავრესი პრინციპი. ამ პრინციპზე ვაგებთ ჩვენ უკვე 9 წელიწადია ამ სახელმწიფოს და მიუხედავად იმისა, თუ ვის ეხება ეს საკითხი, თუ ამ ადამიანმა ჩაიდინა კონკრეტული დანაშაული და ეს არის სასამართლოს მიერ დადგენილი, შესაბამისად პასუხი უნდა აგოს. მიხეილ სააკაშვილი ჩამოსვლის შემთხვევაში მყისიერად იქნება დაკავებული და შესაბამის პენიტენციურ სისტემაში გადაყვანილი, გამომდინარე იქიდან, რომ მის მიმართ არსებობს არაერთ საქმეზე სასამართლოს მიერ დადგენილი გამამტყუნებელი განაჩენი“, – განაცხადა მიქანაძემ.