უცნაურია, როდესაც პრეზიდენტის მრჩეველი დგამს ნაბიჯს პრეზიდენტთან ყოველგვარი კონსულტაციის გარეშე, – ამის შესახებ „ქრონიკასთან“ საუბრისას უკრაინის უმაღლესი რადის დეპუტატმა ალექსეი გონჩარენკომ სააკაშვილზე საუბრისას განაცხადა.
მისი თქმით, ზელენსკის განცხადება იყო განცხადება, რომელიც პრეზიდენტს უნდა გაეკეთებინა, რადგან საქმე ეხება უკრაინის მოქალაქეს.
„ორი მოსაზრებაა მომხდართან დაკავშირებით: პირველი – თუ შევხედავთ მიხეილ სააკაშვილის ნაბიჯს პოლიტიკოსის კუთხით, მაშინ შეგვიძლია ვთქვათ, რომ გარისკა, რადგან იცოდა, რომ დააკავებდნენ. თუ ჩვენ ვსაუბრობთ, მიხეილ სააკაშვილზე, როგორც უკრაინის მოქალაქეზე, რეფორმების ცენტრის ხელმძღვანელსა და პრეზიდენტ ზელენსკის მრჩეველზე, ეს ამბავი ძალიან უცნაურად გამოიყურება, რადგან ამ სტატუსის ადამიანი არალეგალურად კვეთს საზღვარს და დაკავებულია. ეს გარკვეულ ფასად დაუჯდება საქართველოსა და უკრაინის ურთიერთობებს. მე ძალიან მიყვარს საქართველო და საქართველო უკრაინისთვის ძალიან მნიშვნელოვანი ქვეყანაა. არავის სურს უკრაინაში დაძაბულობა ან უხერხულობა.
ახლა რაც შეეხება პოლიტიკური ჭრილიდან ამ ნაბიჯის ანალიზს, მიხეილ სააკაშვილს ალბათ ეგონა, რომ მისი ჩასვლა ადგილობრივ არჩევნებზე, მისი პარტიის შედეგებზე ზეგავლენას მოახდენდა. ჩვენ, ყველა ვხედავთ, რომ ეს ასე არ მოხდა. „ქართულმა ოცნებამ“, მმართველმა პარტიამ მოიგო არჩევნები და პარლამენტის არჩევნები აღარ იქნება. მომავალ არჩევნებამდე ხელისუფლებაშია „ქართული ოცნება“. ზელენსკის განცხადება იყო განცხადება, რომელიც პრეზიდენტს უნდა გაეკეთებინა, რადგან საქმე ეხება უკრაინის მოქალაქეებს. აქ გვარებს არ აქვს მნიშვნელობა: გონჩარენკო, ზელენსკი იქნება თუ სააკაშვილი. ყველას თანაბრად უნდა მივუდგეთ. სახელმწიფო ყველას უნდა დაეხმაროს, მაგრამ კიდევ ერთხელ მინდა აღვნიშნო, რომ უცნაურია, როდესაც პრეზიდენტის მრჩეველი დგამს ნაბიჯს პრეზიდენტთან ყოველგვარი კონსულტაციის გარეშე. ჩვენ ასე გავიგეთ, რადგან პრეზიდენტმა თქვა. უცნაურობის გარდა, ეს აჩვენებს, თუ რა ხდება ზელენსკის გუნდში და ეს კარგი არ არის“, – განაცხადა ალექსეი გონჩარენკომ.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.