87 წლის გზააბნეული მოხუცი საკუთარ სახლს უვნებელი დაუბრუნდა. მამაკაცს, რომელიც ავიაციის ვეტერანი და ვიცე პოლკოვნიკია, დახმარება შსს-ს თანამშრომლებმა გაუწიეს და ოჯახში უვნებელი დააბრუნეს.
ამის შესახებ ინფორმაცია საზოგადოებას ერთ-ერთმა ინტერნეტმომხმარებელმა მარიამ ლომინაძემ მიაწოდა და ამსახველი ფოტომასალაც დაურთო.
„ეს 87 წლის საყვარელი მოხუცი ავიაციის ვეტარანი, ვიცე-პოლკოვნიკია. გუშინ, სადარბაზოში, უცხო ადამიანი შევნიშნეთ და მივხვდით, რომ მოხუცს გზა აებნა, თუმცა დაჟინებით იმეორებდა, რომ ზუსტად ამ სადარბაზოში, მე-6 სართულზე ცხოვრობს. გამოველაპარაკე, ვკითხე შვილებზე, შვილიშვილებზე, მეუღლეზე, თუმცა მათი ვინაობა ვერ გაიხსენა. სამაგიეროდ, დაჟინებით მიმტკიცებდა, რომ ნამდვილად აქ ცხოვრობდა. ვეტერან ვიცე-პოლკოვნიკს ჩვენი ძალებით რომ ვერ დავეხმარეთ,
112 მეშვეობით, საპატრულო პოლიცია გამოვიძახეთ და გლდანი-ნაძალადევის საპატრულო პოლიციის 607-ე ეკიპაჟის წევრები – მამუკა ხიმშიაშვილი და ალექსი გიგაშვილი, დაახლოებით, ხუთ წუთში მოვიდნენ.
ამ მაგარმა ბიჭებმა მყისიერი რეაგირება მოახდინეს და მოხუცი ოჯახს ჩააბარეს. ბაბუას, რომელიც ისევ მიმტკიცებდა, რომ ჩვენს კორპუსში ცხოვრობდა, მეც გავყევი და… გზაში, ვბუტბუტებდი, რა მაგარია, როცა არსებობობენ ადამიანები, რომლებიც სამშობლოს და ხალხს ეხმარებიან. მადლობა თქვენ, მართლაც, ოქროს ადამიანებო“, -წერს მარიამ ლომინაძე სოციალურ ქსელში.
