კულტურის მინისტრმა პარლამენტში გამართულ “მინისტრის საათზე” კულტურული ძეგლების რესტავრაციაზე გაამახვილა ყურადღება.
თეა წულუკიანი გელათის სამონასწტრო კომპლექსის რესტავრაციას შეეხო და აღნიშნა, რომ პროექტი ხარვეზით შესრულდა, რადგან ის ვინც კომპეტენტური იყო, “ჩარეცხეს” და ასაკიდან გამომდინარე თანამდებობა დაატოვებინეს.
„ვინც კომპეტენტური იყო, ისინი ჩარეცხეს ასაკიდან გამომდინარე და მე მომიწია სანთლით მეძებნა ის ადამიანები და ის ჯგუფი, რომელსაც მე რჩევას ვეკითხები და შევკრიბე. ღმერთმა დიდხანს აცოცხლოს ისინი, მაგრამ გამოცდილი არქიტექტორ-რესტავრატორები არიან ყველანი 70-ის და მეტი ასაკის, არაერთი მათგანი 90 წლისაც, მაგრამ ენერგიული და ჩვენ ვნახეთ, რომ სერიოზული დეფიციტია პროფესიების და ამას უკვე მივყავართ იმ სახელოვნებო განათლების რეფორმასთან, რომელზეც მოგვიწევს საუბარი.
ვერც ერთ ძეგლს და მით უმეტეს გელათის მნიშვნელობის ძეგლს, ვერ შეეხება ვერავინ, თუ მას არ აქვს ოსტატების რეესტრიდან ამონაწერი, რომ ის ნამდვილად არის ხითხურო, ქვითხურო, ან კირითხურო. სხვათა შორის სკამებმა და სკამზე მჯდარმა ყოფილმა ხელისუფლების წევრებმა, რომლებიც დღეს აქ ბევრს საუბრობენ, გააკეთეს ისე, რომ მოიშალა ყველანაირი ლიცენზირების და სერტიფიცირების სისტემა. ეს ასე იყო და არსებული კანონის მოქმედება შეაჩერეს. რა თქმა უნდა, ამაზე საუბარი უხერხულია, არ მოსწონთ და მოგვიწოდებენ, ძვირფასო უმრავლესობის წევრებო, რომ წარსულზე არ ილაპარაკოთო.
გელათმა აჩვენა, რომ იყო კარგი ადამიანი, არ არის საკმარისი. საჭიროა, პროფესიონალიზმი და საჭიროა იმის დაჯერება, რომ არ შეიძლება, ძეგლს ეხებოდეს ის, ვინც ძეგლზე მუშაობა არ იცის. დავმალოთ ეს?! მე ვერ დავმალავ. ეს არის პრობლემა და თუ ხელშეწყობა მექნება, მათ შორის ოპოზიციის მხრიდან, რომ ეს ერთად გავასწოროთ, ძალიან ბედნიერი ვიქნები, თუმცა ალბათ ამ შეთავაზებაშიც მავანი დაინახავს სიძულვილის ენას, რაც არ არის არავითარი პრობლემა“, – განაცხადა კულტურის მინისტრმა.