ბიზნესისა და ეკონომიკური საქმიანობის განხორციელებაში ხელს არავის ვუშლით, მაგრამ როდესაც ტროტუარზე გავლა შეუძლებელია, ეს ხელს უშლის ათიათასობით ადამიანს, – ასეთი კომენტარი გააკეთა თბილისის მერმა, კახა კალაძემ მეტროსადგურ „ვარკეთილის“ მიმდებარე ტერიტორიიდან გარემოვაჭრეების გაყვანის გადაწყვეტილებაზე.
კახა კალაძის თქმით, მოვაჭრეებს დაეხმარებიან ბაზრობების ხელმძღვანელებთან კომუნიკაციაში, რათა მათ საქმიანობა გააგრძელონ.
„ჩვენ არავის ხელს არ ვუშლით ბიზნესისა და ეკონომიკური საქმიანობის განხორციელებაში, მაგრამ ყველაფერი უნდა იყოს წესრიგის ფარგლებში. როდესაც ტროტუარზე გავლა შეუძლებელია, ეს ხელს უშლის ათიათასობით ადამიანს.
ძალიან ბევრი შეტყობინება შემოდის ამასთან დაკავშირებით. ჩვენ მაქსიმალურად დავეხმარებით კომუნიკაციაში ბაზრობების ხელმძღვანელებთან, რათა ამ ადამიანების საქმიანობა შესაძლებელი იყოს“, – განაცხადა კახა კალაძემ.
მეტროსადვგურ „ვარკეთილის“ მიმდებარე ტერიტორიაზე გარევაჭრობა აიკრძალება. როგორც თბილისის მერმა დედაქალაქის მთავრობის სხდომაზე განაცხადა, გარემოვაჭრეებმა სპეციალურად გამოყოფილ სავაჭრო სივრცეებში უნდა გადაინაცვლონ.