უკრაინასთან ურთიერთობებში პრობლემებს ოდესის გუბერნატორი ქმნიდა, თქვენ მოგეხსენებათ მისი არაერთი დესტრუქციული განცხადება, – ამის შესახებ საქართველოს პრემიერ-მინისტრობის მოვალეობის შემსრულებელმა გიორგი კვირიკაშვილმა „ნაციონალურ მოძრაობასთან“ შეხვედრისას განაცხადა.
„უკრაინა არის ჩვენი უახლოესი ქვეყანა, ძალიან მნიშვნელოვანი სტრატეგიული პარტნიორი და კიდევ ერთხელ საჯაროდ ვადასტურებ ამას. პრობლემები ამ მიმართულებით იქმნებოდა და არ ვმალავ, და ამ პრობლემებს ოდესის გუბერნატორი ქმნიდა – მისი არაერთი დესტრუქციული განცხადება, მაგრამ ეს არავითარ შემთხვევაში, არცერთ მომენტში, არ ასახულა საქართველოს მხარდაჭერაზე უკრაინასთან მიმართებაში არცერთ საერთაშორისო პლატფორმაზე.
შემიძლია ათობით შემთხვევა მოგიყვანოთ, როდესაც ჩვენ ძალიან მკაფიო მხარდაჭერა გამოვხატეთ უკრაინის მიმართ და ჩვენ აქ თავის სამართლებელი არაფერი გვაქვს. კიდევ ერთხელ ვამბობ, რომ რა თქმა უნდა, იყო უხერხულობები და მე ვიქნებოდი ახლა სირაქლემას პოზიციაში, რომ ამაზე არ მეთქვა. მაგრამ იმას ვამბობ, რომ ამ უხერხულობებს არცერთ მომენტში არ უქონია გავლენა ორმხრივ ურთიერთობებზე და ჩვენი მხარდაჭერა უკრაინის მიმართ ყოველთვის იყო ძალიან მკაფიო“, – განაცხადა გიორგი კვირიკაშვილმა.