ნაძალადევის რაიონის გამგეობასა და „ჩაფიძის სახელობის გადაუდებელი კარდიოლოგიური ცენტრის“ ურთიერთთანამშრომლობის ფარგლებში, რაიონში არსებული საჯარო სკოლის პედაგოგებს უფასო კვლევები ჩაუტარდებათ.
ურთიერთთანამშრომლობის მემორანდუმს ხელი მოაწერეს ნაძალადევის რაიონის გამგებელმა ირაკლი ანდღულაძემ და ჩაფიძის კლინიკის აღმასრულებელმა დირექტორმა რევაზ ჯორბენაძემ.
„ჩვენი რაიონის სკოლის პედაგოგებს ძალიან კარგი შესაძლებლობა ექნებათ, ჯანმრთელობის პროფილაქტიკის მიზნით, საქართველოში ერთ-ერთ მოწინავე კარდიოლოგიურ კლინიკაში უფასოდ ჩაიტარონ საბაზისო კვლევები. აღნიშნული პროგრამის შესახებ სკოლების ინფორმირებას გამგეობა უზრუნველყოფს. მოხარული ვარ, რომ ასეთ მნიშვნელოვან ინიციატივას სწორედ ნაძალადევის რაიონში ჩაეყარა საფუძველი“, – განაცხადა ირაკლი ანდღულაძემ.
კარდიოლოგიური პრობლემების მქონე მასწავლებლებს საშუალება ექნებათ, პერიოდულად უფასოდ ჩაიტარონ ამბულატორიული სამედიცინო გამოკვლევები, კერძოდ: ელექტროკარდიოგრაფია, ექოკარდიოსკოპია, გლუკოზისა და საერთო ქოლესტერინის ანალიზები და კარდიოლოგიური კონსულტაცია.