საქართველოს პარლამენტთან „დროას“ ორგანიზებით აქცია მიმდინარეობს. აქციის სლოგანია „დამოუკიდებლობა, თავისუფლება, ერთიანობა“.
აქციის ორგანიზატორების განცხადებით, აქციის მიზანია კიდევ ერთხელ დააფიქსირონ პოზიცია, რომ როგორც 1989 წლის 9 აპრილს, დღესაც მტკიცედ დგას ქართველი ხალხი რუსული აგრესიის წინაშე.
მათი თქმით, ქვეყანაში ერთიანობაა საჭირო.
აქციაზე სიტყვით გამოდიან სამოქალაქო აქტივისტები და რიგითი მოქალაქეები. შეკრებილებს მიმართავს უკრაინის უმაღლესი რადას წევრი ალექსეი გონჩარენკო.
როგორც „დროას“ ლიდერმა, ელენე ხოშტარიამ აღნიშნა, 9 აპრილის ყველაზე დიდი გაკვეთილი არის ერთობა.
„დღეს ჩვენ იგივე შემართებით უნდა ვიბრძოლოთ ჩვენი ქვეყნის დასაცავად. დღევანდელი აქცია არ არის პარტიული აქცია, უბრალოდ, ჩვენი ინიციატივა იყო. მე საერთოდ არ ვაპირებ გამოსვლას, მაგრამ გამომსვლელთა შორის იქნება დევნილი, რომელმაც გამოიარა ჭუბერი, ასევე იქნებიან იმ თაობის ადამიანები, ვინც აქ იდგნენ. იქნება ჩართვა ჩვენი მეგობრებისა, რომლებიც დღეს იბრძვიან უკრაინაში, მათ შორის იქნება გონჩარენკო. გვინდა ხაზი გავუსვათ იმ ერთობას, რომელიც დღეს არის საქართველოსა და უკრაინის ამოცანებს შორის“, – განაცხადა ელენე ხოშტარიამ.