შალვა რამიშვილისა და ხატია ეკიზაშვილის შვილის რუსულენოვან ვიდეომიმართვას დიდი გამოხმაურება მოჰყვა. საზოგადოების დიდმა ნაწილმა ის დადებითად შეაფასა, თუმცა, ხატია ეკიზაშვილის თქმით, იყო კრიტიკაც.
აღნიშნულთან დაკავშირებით პატარა ალექსანდრეს დედა სოციალურ ქსელში მიმართვას ავრცელებს.
“მეგობრებო, ნაცნობებო, უცნობებო! ყველას დიდი მადლობა ჩემი ალექსანდრეს ასეთი შეფასებისთვის, კომპლიმენტებისთვის, დალოცვისთვის… არ წყდება ზარები, ინბოქსში წერილები… უამრავი წერილი მივიღე პოლონელებისგან, უკრაინელებისგან, ლიეტუვა-ლატვია-ესტონეთიდან და რუსებისგანაც კი…
გულწრფელად გეტყვით, ერთი წამითაც არ მიფიქრია, ასეთი გამოხმაურება თუ ექნებოდა ამ ვიდეოს, თორემ შეიძლება სულაც არ ამეტვირთა.. უკვე მერიდება კიდეც, ბევრმა გამაკრიტიკა, ბავშვმა რატომ უნდა იცოდეს და საუბრობდეს ასეთ თემებზეო და მინდა მათაც ვუპასუხო. – დიახ, ჩემმა შვილმა ადრეული ასაკიდან იცის, რომ რუსეთი მტერია, რომ საბჭოთა კავშირი ბოროტება იყო, იცის 9 აპრილი, აფხაზეთი, ოსეთი, საზღვარს (მავთულხლართებს) რომ სწევენ რუსები ყოველდღიურად – ეგეც იცის.
ბაკურიანში ვიყავით, ორივე ავად (სასტუმროს ნომერში მარტო ჩვენ ორნი), 24 თებერვალს ომი რომ დაიწყო. ესმოდა ჩემი სატელეფონო საუბრები, მხედავდა აღელვებულს, ცრემლიანს და ერთად ვუსმენდით ახალ ამბებს! ასეც რომ არ ყოფილიყო… რატომ უნდა დამემალა?!
ცხადია, არ ვაჩვენებ კოშმარულ კადრებს, რასაც ჩვენ პირდაპირ ეთერში ვუყურებთ, მაგრამ არც ვარდისფერ სათვალეებს ვუკეთებ! ყველამ თავად გადაწყვიტოს, შვილს როგორ გაზრდის! მე ასე მიმაჩნია სწორად! ვინმე თუ სხვანაირად თვლის – მე არ ვუვარდები ჭკუის სწავლებით და ნურავინ მიმითითებს, ჩემს შვილს რა ვუთხრა! რუსეთი – მტერია! პუტინი – ბოროტია! 2+2=4 ჯამი ჭურჭელია! დიდება გმირებს”, – წერს ხატია ეკიზაშვილი.