საქართველოს კულტურის, სპორტისა და ახალგაზრდობის მინისტრი თეა წულუკიანი გურჯაანის მუნიციპალიტეტის მერთან ზურაბ უტიაშვილთან და მერიის წარმომადგენლებთან ერთად, ვასო გოძიაშვილის სახელობის მოყვარულთა თეატრის შენობა დაათვალიერა და მიმდინარე სარეაბილიტაციო სამუშაოებს გაეცნო. თეატრის შენობის რეაბილიტაციას საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი ახორციელებს. პროცესის დასრულების შემდეგ შენობა მულტიფუნქციური გახდება და რეგიონის მაყურებელს მრავალფეროვან და საინტერესო რეპერტუარს შესთავაზებს.
სამინისტროს ინფორმაციით, შეხვედრას ასევე საქართველოს პარლამენტის გურჯაანის, სიღნაღის, დედოფლისწყაროსა და საგარეჯოს მაჟორიტარი დეპუტატთან დავით სონღულაშვილი დაესწრო. წულუკიანმა აღნიშნა, რომ სამინისტრომ გაიზიარა დეპუტატის ინიციატივა იმასთან დაკავშირებით, რომ სანამ თეატრი რეაბილიტაციის შემდეგ სრულფასოვნად ამუშავდება, შემოქმედებითი პროცესი მანამდეც აქტიურად მიმდინარეობდეს. შესაბამისად, კულტურის სამინისტრო დააფინანსებს შოთა რუსთაველის თეატრისა და კინოს უნივერსიტეტის სტუდენტების მიერ სპექტაკლების დადგმას ველისციხის თეატრში. თეა წულუკიანმა განაცხადა, რომ სამინისტრომ უნივერსიტეტის სტუდენტებს უკვე შესთავაზა ველისციხის თეატრში სპექტაკლების დადგმის დაფინანსება და მათი მხრიდან ინტერესი საკმაოდ მაღალია.
„ჩვენ შევძლებთ, რომ რეაბილიტირებულ თეატრში ჩვენმა სტუდენტებმა პრემიერაც ითამაშონ. კულტურის სამინისტრო ყოველთვის არის ახალგაზრდების გვერდით. რა თქმა უნდა, სადადგმო ხარჯის დაფინანსების მიმართულებით, პრიორიტეტი იქნება რეგიონული თეატრები და მაჟორიტარი დეპუტატის თხოვნის შესაბამისად, პირველ რიგში, ეს იქნება ველისციხის თეატრი” – განაცხადა წულუკიანმა.
ველისციხის ვასო გოძიაშვილის სახელობის მოყვარულთა თეატრი 1889 წელს აშენდა და მისი ისტორია საუკუნეზე მეტს ითვლის