უკრაინაში დღეს სამი ქართველი მებრძოლი დაიღუპა, – ამის შესახებ უკრაინაში საქართველოს ელჩმა, გიორგი ზაქარაშვილმა საქართველოს პირველ არხს სატელეფონო საუბრისას განუცხადა.
ერთი მებრძოლის დაღუპვისა და ერთის დაჭრის შესახებ ინფორმაცია თავდაპირველად სოციალურ ქსელში დღეს გავრცელდა, რომლის შესახებ ინფორმაცია პირველ არხს უკრაინაში საქართველოს საელჩოში დაუდასტურეს. ამასთან, კიდევ ორი მეომრის დაღუპვის შესახებ ინფორმაცია კი მოგვიანებით გახდა ცნობილი. სად და რა ვითარებაში დაიღუპნენ ისინი, უკრაინაში საქართველოს ელჩის, გიორგი ზაქარაშვილის თქმით, ამ ეტაპზე უცნობია.
„სამწუხაროდ, მოგვივიდა ინფორმაცია, რომ არის სამი დაღუპული ქართველი, მათ შორის ერთი ნამდვილად საქართველოს მოქალაქეა, ორ დაღუპულზე ვამოწმებთ ინფორმაციას. ჯერჯერობით ვერ გეტყვით, სად და რა ვითარებაში დაიღუპნენ. მოგვიანებით, ალბათ მეტი დეტალი გვეცოდინება. დაჭრილია ერთი. რამდენადაც მე ვიცი, მის სიცოცხლეს საფრთხე არ ემუქრება“, – განაცხადა გიორგი ზაქარაშვილმა.