შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველი, სამოქალაქო უსაფრთხოების უმცროსი ლეიტენანტი – დიტო მულაძე ვეტერან ძიუდოისტთა მსოფლიო ჩემპიონატის ოქროს მედალოსანი გახდა, – ინფორმაციას საგანგებო სიტუაციების მართვის სამსახური ავრცელებს.
მათი ცნობით, პოლონეთში, ქალაქ კრაკოვში 30 წლიდან 40 წლამდე კატეგორიაში გამართულ ფინალურ ტურნირში დიტო მულაძემ ბრიტანელი სპორტსმენი დაამარცხა და მსოფლიო ჩემპიონის ტიტული მოიპოვა.
“სამოქალაქო უსაფრთხოების უმცროს ლეიტენანტს სპორტული წარმატება საგანგებო სიტუაციების მართვის სამსახურის უფროსმა, თეიმურაზ მღებრიშვილმა და სახანძრო სამაშველო ძალების დეპარტამენტის უფროსმა, დავით სუხიშვილმა პირადად მიულოცეს.
სამსახურის უფროსმა ვეტერან სპორტსმენს და მეხანძრე-მაშველ დიტო მულაძეს სამსახურის სახელით მხარდაჭერა გამოუცხადა და სამახსოვრო საჩუქარი გადასცა.
საგანგებო სიტუაციების მართვის სამსახური ულოცავს სამოქალაქო უსაფრთხოების უმცროს ლეიტენანტს პოლონეთში გამართულ ტურნირში მიღებულ ოქროს მედალს და მსოფლიო ჩემპიონის ტიტულს”, – ნათქვამია ინფორმაციაში.
