შინაგან საქმეთა სამინისტრო ბავშვებსა და მოზრდილებს “თბილისი მოლში“ უმასპინძლებს

შინაგან საქმეთა სამინისტრო წინასაახალწლოდ, 24-25 დეკემბერს, ბავშვებსა და მოზრდილებს „თბილისი მოლში“ უმასპინძლებს და უამრავ სიურპრიზს დაახვედრებს. შსს-ს მომსახურების სააგენტო, დაცვის პოლიცია და „112“ იმიტირებულ „უსაფრთხო ქალაქს“ მოაწყობენ. შსს-ს დაცვის პოლიციის დეპარტამენტი, „უსაფრთხო ქალაქში“ „დაცულ სახლს“ წარმოადგენს, სადაც ბავშვებს სხვადასხვა საინტერესო შემეცნებით კონკურსს შესთავაზებენ. შსს-ს მომსახურების სააგენტოს თანამშრომლები 5-დან 12 წლამდე ასაკის ბავშვებს, ველოსიპედის მართვის უფლების მოსაპოვებლად, სახალისო თეორიულ და პრაქტიკულ გამოცდებს ჩაუტარებენ. შსს-ს გადაუდებელი დახმარების ოპერატიული მართვის ცენტრი კი საბავშვო პროექტს-„კოსმოსურ ხომალდს“ წარმოადგენს, სადაც ბავშვებს „112“-ის ოპერატორები ფუტურისტული იმიჯით დახვდებიან და თანამედროვე ტექნოლოგიების გამოყენებით, სპეციალურად მათთვის შექმნილ კომპიუტერულ თამაშებს შესთავაზებენ. ხომალდის კაპიტანი გამარჯვებულებს უნივერსალური საშვებით დააჯილდოვებს, რომელთა საშუალებითაც ისინი ნამდვილ „112“-ში მოხვდებიან.