რას აცხადებს მოკლული ქარდავას შვილი მამის მკვლელთა სასამართლო განაჩენზე

“საზოგადოებამ თვითონ განსაჯოს სწორი არის თუ არა ორი ადამიანის მკვლელობისთვის 8 წლიანი პატიმრობა“, – ამის შესახებ ჟურნალისტებს მოკლული პაატა ქარდავას შვილმა ქრისტინე ქარდავამ რომან შამათავასთვის გამოტანილი განაჩენის კომენტარებისას განუცხადა.
მისი თქმით, 9 წლის განმავლობაში საქმის გამოძიებასა და დამნაშავის კანონის სრული სიმკაცრით დასჯას ელოდნენ.
„საზოგადოებამ თვითონ განსაჯოს სწორი არის თუ არა ორი ადამიანის მკვლელობისთვის მხოლოდ და მხოლოდ 8 წლიანი პატიმრობა. როდესაც ორი ოჯახი მე-9 წელია ველოდებით საქმის გამოძიებას და ბრალდებულისთვის უვადო პატიმრობას.
სამწუხაროდ, არ ვიცი რამდენად სწორი და ობიექტური გადაწვეტილება მიიღო მოსამართლემ“, – განაცხადა ქრისტინე ქარდავამ.
შეგახსენებთ, რომ თბილისის საქალაქო სასამართლომ კუდ-ის აფხაზეთის მთავარი სამმართველოს ყოფილ უფროსს რომან შამათავას რვა წლით თავისუფლების აღკვეთა მიუსაჯა.
რომან შამათავა პასუხისგებაში საქართველოს თავდაცვის სამინისტროს დაზვერვის დეპარტამენტის ოფიცრის პაატა ქარდავასა და სამეგრელო-ზემო სვანეთის სატყეო სამმართველოს რეინჯერის დათო ცინდელიანისთვის თავისუფლების უკანონოდ აღკვეთასა და განზრახ მკვლელობისთვის მიეცა. გამოძიების ინფორმაციით, შამათავამ ცინდელიანს 2008 წლის აგვისტოში თავისუფლება უკანონოდ აღუკვეთა, რის შემდეგაც ბათუმში, ზღვაში ნავით გაიყვანა, თავში გასროლით მოკლა, კვალის დაფარვის მიზნით ცხედარს მძიმე საგანი გამოაბა და ზღვაში ჩააგდო.
ბრალდების თანახმად, ანალოგიური ქმედებით შამათავამ 2008 წლის 27 აგვისტოს თავდაცვის სამინისტროს დაზვერვის ოფიცერი პაატა ქარდავა მოკლა და მისი ცხედარიც ზღვაში ჩააგდო. საგამოძიებო უწყების ცნობით, კუდ-ის აფხაზეთის სამმართველოს ყოფილი უფროსი შამათავა ცინდელიანს და ქარდავას აფხაზ სეპარატისტებთან თანამშრომლობაში ადანაშაულებდა.