არ შეიძლება რაიმე ფორმით გაამართლო სახელმწიფო ინტერესების საწინააღმდეგო მოქმედება, – ამის შესახებ საპარლამენტო უმრავლესობის წევრმა, ირაკლი ჩიქოვანმა განაცხადა „ნაციონალურ მოძრაობაზე“ საუბრისას.
„ეს კიდევ ერთხელ მიანიშნებს იმაზე, თუ რა დამოკიდებულება ჰქონდა მაშინდელ უმრავლესობას სახელმწიფო ინტერესებთან მიმართებით. დღეს ისინი საუბრობენ არაერთ საბაბზე, მიზეზზე თუ რის გამო დაუჭირეს ამ ყველაფერს მხარი, თუმცა ვიმეორებ – არ შეიძლება რაიმე ფორმით გაამართლო სახელმწიფო ინტერესების საწინააღმდეგო მოქმედება“, – აღნიშნა ჩიქოვანმა.
ჰააგის სასამართლოს მთავარი პროკურორის, კარიმ ხანის განცხადებით, აგვისტოს ომის საქმეზე გამოძიების ეტაპი დასრულდა.
ხელისუფლებაში იმ რეზოლუციაზე საუბრობენ, რომელიც 2008 წლის აგვისტოს ომიდან ორ თვეში მიიღეს. დოკუმენტში, როგორც რუსეთის ასევე საქართველოს მხრიდან ომის დანაშაულის შესაძლო ჩადენაზეა საუბარი, რასაც ევროსაბჭოში „ნაციონალურმა მოძრაობამ“ მხარი დაუჭირა.