პირველი – ჩვენ ევროპარლამენტში ვიცით და პატივს ვცემთ უფრო მჭიდრო ევროპული და ევროატლანტიკური ინტეგრაციის არჩევანს. თქვენ იყავით ძალიან მკაფიოები და თანმიმდევრულები, როდესაც გამოხატავდით თქვენს ევროპულ მისწრაფებებს. ჩვენ თქვენ გვერდით ვდგავართ, მხარს გიჭერთ ევროპულ გზაზე. მეორე – ჩვენ არასდროს, გავიმეორებ, არასდროს ჩაგითრევთ რომელიმე ომში, – ამის შესახებ ევროპარლამენტარმა მარინა კალიურანდმა ევროპარლამენტში საქართველოში არსებული მდგომარეობის შესახებ გამართული დებატების დროს განაცხადა.
„გვახსოვს 2008 წლის ომი და ადამიანების დაკარგული სიცოცხლე. ყოველთვის დავუჭერთ მხარს საქართველოს ტერიტორიულ მთლიანობასა და სუვერენიტეტს. ვუსურვებთ ქართველ ხალხს მშვიდობას, უსაფრთხოებასა და კეთილდღეობას. ჩემი გზავნილი ქართველი პოლიტიკოსებისადმი მკაფიოა – უკრაინაში დაწყებულმა ომმა საქართველოს შესაძლებლობის ფანჯარა გაუხსნა და არ გაფლანგოთ ის“, – განაცხადა კალიურანდმა.