თამაზ მეჭიაური – ომარი მეგობარი კაცია და იდეურადაც საკმაოდ ახლოს არის

პარლამენტარი თამაზ მეჭიაური მიესალმება, თუკი მისი კოლეგა ომარ ნიშნიანიძე ”ქართულ ოცნებას” დატოვებს და პოლიტიკურ მოღვაწეობას მასთან ერთად განაგრძობს.
როგორც მეჭიაურმა თავისი კოლეგის გეგმების შეფასებისას განაცხადა, მას ომარ ნიშნიანიძესთან გასაყოფი არაფერი აქვს.
”ომარ ნიშნიანიძესთან გასაყოფი არაფერი მაქვს. ის ზღვების საკითხშია და მე ხმელეთზე ვარ. ომარი მეგობარი კაცია და იდეურადაც საკმაოდ ახლოს არის, თუ მას ასეთი სურვილი ექნება, დიდი სიამოვნებით. საერთოდ, ყველა თემაზე ყველასთან ვსაუბრობ ფრაქციის შიგნით, მაგრამ ამ ეტაპზე ეს თემა არ გაგვივლია, თუმცა მივესალმები მის ასეთ გადაწყვეტილებას”, – განაცხადა მეჭიაურმა.
მისივე თქმით, რა სახელწოდება ექნება მის პარტიას, დაახლოებიოთ ორ კვირაში გახდება ცნობილი.
საპარლამენტო უმრავლესობის წევრი ომარ ნიშნიანიძე არ გამორიცხავს, რომ ”ქართული ოცნება” დატოვოს. შესაბამისი განცხადება ნიშნიანიძემ ჟურნალისტებთან საუბარში გააკეთა და განმარტა, რომ შესაძლოა, თამაზ მეჭიაურის გუნდში ვიხილოთ.