მამა გიორგი მამალაძის ადვოკატი მიხეილ რამიშვილი აცხადებს, რომ ბრალდებულ მამალაძეს ხვალ დაკითხავენ.
მიხეილ რამიშვილმა “პირველს” განუცხადა, რომ დაკითხვის ზუსტი დრო ხვალ დილით შეთანხმდება.
“დაგვიკავშირდნენ პროკურატურიდან და აღნიშნეს, რომ უნდა დაკითხონ მამა გიორგი. ალბათ, ხვალ მოხდება მამა გიორგის დაკითხვა. დროზე ხვალ დილით შევთანხმდებით”,- აღნიშნა ადვოკატმა.
10 თებერვალს მკვლელობის მომზადების ფაქტზე დეკანოზი გიორგი მამალაძე დააკავეს. მთავარი პროკურორის ინფორმაციით, აღნიშნულ ფაქტზე გამოძიება დაიწყო 2017 წლის 2 თებერვალს ერთ-ერთი მოქალაქის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა ციანიდის მოძიებაში დახმარება, რომლის გამოყენებითაც ამ უკანასკნელს უნდა მოეხდინა მაღალი იერარქიის სასულიერო პირის სიცოცხლის ხელყოფა.
მოგვიანებით, ბრალდებული დეკანოზის ადვოკატმა გაავრცელა ინფორმაცია, რომ გიორგი მამალაძისთვის წარდგენილ ბრალდებაში პატრიარქის მდივან-რეფერენტის შორენა თეთრუაშვილის სახელი ფიგურირებდა.