აშშ-ის სახელმწიფო დეპარტამენტის შიდა მემორანდუმზე, უნდა ვთქვა, რომ გაკვირვებული ვარ იმ ყურადღებით, რომელიც ამაზე გამახვილდა საქართველოში, რადგან ეს არის შიდა მემორანდუმი სახელმწიფო დეპარტამენტისთვის, რომელიც ეხმარება სახელმწიფო დეპარტამენტში იმ ადამიანებს, რომლებსაც სურთ უფრო ინკლუზიურები იყვნენ სამუშაო ადგილზე, – ამის შესახებ ამერიკის ელჩმა საქართველოში რობინ დანიგანმა მედიასთან განაცხადა.
„მე ვიტყვი, რომ ამას საქართველოსთან არანაირი კავშირი არ აქვს. ეს ჩვენ არ გამოგვიქვეყნებია საქართველოსთვის. ეს უნდა დაეხმაროს სახელმწიფო დეპარტამენტში მყოფ ადამიანებს, იყვნენ უფრო ინკლუზიურები. ქართულ ენაშიც არ არის სქესის განმსაზღვრელი ნაცვალსახელები, რაც ჩემი აზრით, საინტერესოა. მე ვარ ამაყი დედა, ამაყი ცოლი, ამაყი და, ჩემი შვილებიც, ჩემი მშობლებიც. მე ვფიქრობ, რომ ჩვენ ყველა უნდა ვეცადოთ გამოვიყენოთ ისეთი ენა, რომელიც სხვებს პატივისცემით ეპყრობა. გმადლობთ“, – აღნიშნა ელჩმა.
აშშ-ის სახელმწიფო მდივანმა ენტონი ბლინკენმა შიდა მოხმარებისთვის გამოცემულ მიმართვაში თანამშრომლებს მოუწოდა, თავი აარიდონ ისეთი სიტყვების გამოყენებას, როგორიცაა „დედა“, „მამა“, ქალბატონებო და ბატონებო“, „ვაჟიშვილი“, „ქალიშვილი“. „ცოლი“, „ქმარი“.