ლილოდან გუშინ გატაცებული ბიზნესმენი „ქრონიკასთან“ პირველ კომენტარს აკეთებს. მოქალაქე, რომლის გატაცების გამოც გუშინ თბილისში სპეცოპერაცია ჩატარდა, ამ ეტაპზე მედიასთან ურთიერთობას ერიდება.
მისი ინფორმაციით, დანაშაულებრივი ჯგუფი 6 ადამიანისგან შედგებოდა და გამოძიება ამ წუთებში კიდევ ერთი პირის დაკავებაზე მუშაობს. ბიზნესმენისთვის მისი გატაცების მოტივი გაუგებარია. მისივე თქმით, გამტაცებლებიდან ვერცერთი ამოიცნო, ამიტომ ვარაუდობს, რომ ბრალდებულები თავს გამოძალვის მიზნით დაესხნენ.
გამოძიებამ 5600 ლარი ნივთმტკიცებად გუშინვე ამოიღო. შინაგან საქმეთა სამინისტრომ სპეცოპერაციის შედეგად ჯამში 5 პირი დააკავა, მათ მძევლის ხელში ჩაგდებას და ცეცხლსასროლი იარაღის მართლსაწინააღმდეგო შეძენა-შენახვა-ტარებას ედავებიან.
შინაგან საქმეთა სამინისტრომ დღეს სამგორში ჩატარებული სპეცოპერაციის შესახებ განცხადება გაავრცელა. როგორც განცხადებაშია ნათქვამი, მათ დანაშაულებრივი ჯგუფის 5 წევრი მოქალაქის მძევლად ხელში ჩაგდების, ასევე, ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, თბილისში დააკავეს.