აშშ-ის პრეზიდენტმა დონალდ ტრამპმა თავის სოციალურ ქსელში დაწერა, რომ კეროლაინ ლევიტს თეთრი სახლის პრესმდივნის პოსტზე ქეთი ზაქარია ჩაანაცვლებს.
„ჩემთვის დიდი პატივია, დავნიშნო პრესმდივნად ქეთი ზაქარია. ქეთი ახლა Truth Social-ის კომუნიკაციების უფროს მრჩევლად მუშაობს, რასაც ის თავს შესანიშნავად ართმევს!
ქეთი კალიფორნიიდანაა. მანამდე ის შიდა უსაფრთხოების დეპარტამენტში საზოგადოებასთან ურთიერთობის საკითხებში პრესსპიკერისა და მდივნის თანაშემწის მოადგილის თანამდებობებს იკავებდა.
ქეთი პეპერდაინის უნივერსიტეტის კარუზოს სამართლის სკოლის გამორჩეული კურსდამთავრებულია, იურისტია და ხშირად აკეთებს კომენტარებს ისეთი მედიასაშუალებებისთვის, როგორებიცაა Fox News-ი და Newsmax-ი.
მანამდე ის ჩემს საარჩევნო კამპანიებშიც მონაწილეობდა და საკვანძო შტატებში მუშაობაში მეხმარებოდა. შვიდი შტატიდან შვიდივე მოვიგეთ.
მისი საქმიანობის ისტორია უნაკლოა. ქეთი თავიდანვე ჩემი ერთგული და გამორჩეული მხარდამჭერი იყო. ის ასევე MAGA-ს მოძრაობის ერთგული გულშემატკივარი და წევრია!
დარწმუნებული ვარ, ქეთი, როგორც თეთრი სახლის მომავალი პრესმდივანი, ჩვენი ქვეყნისთვის მნიშვნელოვან შედეგებს მოიტანს. მას მედიისა და ამერიკელი ხალხის პატივისცემა აქვს და ჩემს ადმინისტრაციასთანაც შესანიშნავად ითანამშრომლებს.
ქეთი შესანიშნავ კეროლაინ ლევიტს შეცვლის, რომელმაც პრესმდივნის თანამდებობაზე ფანტასტიკური სამუშაო შეასრულა. წარმატებებს გისურვებ, ქეთი!“, – დაწერა ტრამპმა.
ცნობისთვის, თეთრი სახლის პრესმდივნის თანამდებობა მას შემდეგ გახდა ვაკანტური, რაც მიმდინარე წლის აგვისტოში კეროლაინ ლევიტმა პოსტი დატოვა.