შეზღუდული შესაძლებლობების თემის გამოყენება პოლიტიკური მიზნებისთვის დაუშვებელია და ცალსახად შემიძლია ვთქვა, რომ ეს ინიციატივა არანაირ პროექტს და მხარდაჭერას არ შეუშლის ხელს, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, რატი იონათამიშვილმა განაცხადა. დეპუტატი გამოეხმაურა „უცხოური გავლენის გამჭვირვალობის შესახებ“ კანონპროექტთან დაკავშირებით შეზღუდული შესაძლებლობების მქონე პირების განცხადებას.
„პირიქით, შეუძლებელია ჩვენ გამჭვირვალობის წინააღმდეგ ვიყოთ და გამჭვირვალობას არ ვუჭერდეთ მხარს, მითუმეტეს თუ ვინმე ახორციელებს პოზიტიურ კონტრიბუციას ნებისმიერი მიმართულებით მათ შორის შშმ პირთა გაძლიერების მიმართულებით. ეს ჩვენი საერთო ინტერესი უნდა იყოს, ვინაიდან საზოგადოება მადლობასაც ეტყვის ნებისმიერს, ვინც ამ მხრივ პოზიტიურ წვლილს აფიქსირებს“, – განაცხადა იონათამიშვილმა.
შეზღუდული შესაძლებლობების მქონე პირები და მათი წარმომადგენლები გამჭვირვალობის შესახებ კანონპროექტს ეხმაურებიან. ისინი კატეგორიულად ეწინააღმდეგებიან პარლამენტში წარდგენილ დოკუმენტს და მიაჩნიათ, რომ კანონის მიღება დააზიანებს არა მხოლოდ არასამთავრობო ორგანიზაციებს, მედიასა და სამოქალაქო საზოგადოებას, არამედ საფრთხის შემცველია თავად შეზღუდული შესაძლებლობების მქონე პირებისათვის.