ეუთო ჟენევის საერთაშორისო მოლაპარაკებების მე-60 რაუნდთან დაკავშირებით, რომელიც დღეს გაიმართა, განცხადებას ავრცელებს.
„უაღრესად რთული რეგიონული და გეოპოლიტიკური გარემოს მიუხედავად, მონაწილეებმა კიდევ ერთხელ დაადასტურეს თავიანთი ერთგულება ჟენევის საერთაშორისო მოლაპარაკებების პროცესისადმი, როგორც ერთადერთი პლატფორმისადმი, სადაც კონფლიქტის შედეგები განიხილება 2008 წლიდან“, – ნათქვამია განცხადებაში.
„[მოლაპარაკებების] მონაწილეებმა 2023 წლის დეკემბერში ჩატარებული ბოლო რაუნდის შემდეგ ადგილზე [შექმნილი] უსაფრთხოების ვითარება განიხილეს და შედარებით სტაბილურად შეაფასეს. მოხდა აზრთა ფართო და არსებითი გაცვლა ჟენევის საერთაშორისო მოლაპარაკებების დღის წესრიგის ძირითადი საკითხების შემდგომი გადაწყვეტის გზებზე, მათ შორის ძალის გამოუყენებლობასა და უსაფრთხოების საერთაშორისო მექანიზმებზე. თანათავმჯდომარეებმა მოუწოდეს მონაწილეებს, იფიქრონ ინოვაციურ მიდგომებზე და ჩაერთონ კონსტრუქციულად, რათა მიაღწიონ პროგრესს და კონკრეტულ შედეგებს ამ და სხვა თემებზე, კონფლიქტით დაზარალებული მოსახლეობის საკეთილდღეოდ და გრძელვადიანი მშვიდობისთვის“, – აღნიშნულია განცხადებაში.
განცხადებაში ნათქვამია, რომ იძულებით გადაადგილებულ პირთა და ლტოლვილთა საკითხის განხილვა ვერ მოხერხდა ზოგიერთი მონაწილის მიერ შეხვედრის დატოვების გამო.