„იმედის კვირას“ წყარომ „ენჯეოებიდან“ გაფლანგული 200 000 დოლარის შესახებ მიაწოდა ინფორმაცია. წყარომ „იმედის კვირის“ რედაქციაში კონფიდენციალურობის დაცვის თხოვნით ელექტრონულად წერილი გამოაგზავნა.
წყაროს ცნობით, გაფლანგულია 200 000 ამერიკული დოლარი. ეს ფული იმ დაფინანსების ნაწილია, რომელიც ამერიკის საერთაშორისო განვითარების სააგენტომ, „ზინქ ნეთქვორქს“ საქართველოში კონკრეტული პროექტის – „ინფორმაციის სანდოობის ხელშეწყობა“ – განხორციელებისთვის გამოუყო. პროექტის ხელმძღვანელად კი მიხეილ ბენიძე შეირჩა. წყარო ირწმუნება, რომ მიხეილ ბენიძემ ამ პროექტის ფარგლებში USAID-ის კუთვნილი 200 000$ „გაფლანგა/მოიპარა“.
„ორგანიზაცია „ზინკი“ (შპს „ზინკ ნეთვორქი“) ახორციელებს USAID-ის ინფორმაციული უსაფრთხოებისა და სანდოობის პროგრამას, რომლის მენეჯერი იყო მიხეილ ბენიძე, პროგრამას კურირებს USAID-ის მისიის დემოკრატიის მიმართულების ხელმძღვანელი ქეთევან ბაქრაძე)
ცდილობენ დამალონ, რომ მიხეილ ბენიძემ, რომელიც ამ პროექტს ხელმძღვანელობდა, პროგრამის ფარგლებში მოიპარა/გაფლანგა 200 000 აშშ დოლარი. შემდეგ ითხოვდა ხარჯების გაზრდას, რაზეც დონორმა უარი უთხრა. პროექტის თანხა რომ გაფლანგულია, ამის შესახებ საქმის კურსშია საქართველოში USAID-ის მისიის ხელმძღვანელი ჯონ პენელი. ორგანიზაციამ ამის გამო ბენიძე ჩამოაშორა პროექტს, თუმცა, არ უნდათ სკანდალის გახმაურება. საქმის კურსშია ასევე პროგრამების მენეჯერი ლინა პანტელეევა“, – აღნიშნავს წყარო.
მიხეილ ბენიძესთან „იმედის კვირის“ ზარის შემდეგ, წყარომ „იმედის კვირას“ კიდევ ერთი წერილი მისწერა:
„რომ იცოდეთ, ბენიძის ზარის შემდეგ, ახლახან ჯო ლარსენმა [USAID-ის კავკასიის მისიაში სტრატეგიული კომუნიკაციების ხელმძღვანელი] მაკა ჯაფარიძეს [მედიასთან საკონტაქტო პირი] უთხრა, კვირას ირაკლი ჩიხლაძე და ცოტნე გეგეჭკორი დაცხებენ მიშა ბენიძეს, გეგეჭკორი აუცილებლად დარეკავს კომენტარისთვის და მოემზადეთო. ჯაფარიძემ ლარსენს უთხრა, შენთან გადმოვამისამართებო. ბოლოს გადაწყვიტეს, რომ თუ დარეკავთ, მხოლოდ წერილობითი ფორმით გიპასუხონ“.