მოსახლეობამ უნდა იცოდეს, ვინ აფინანსებს ამა თუ იმ არასამთავრობო ორგანიზაციას, მედიას, – ამის შესახებ „ხალხის ძალის“ საერთაშორისო ურთიერთობათა მდივანმა ეკა სეფაშვილმა განაცხადა.
მან გამჭვირვალობის კანონპროექტთან დაკავშირებით გააკეთა მედიასთან კომენტარი.
„საქმიანობის შეზღუდვა ამ კანონის მიხედვით არ ხდება, ჩვენი ინტერესის სფერო მხოლოდ ინფორმაციაა ფინანსური წყაროების შესახებ და ეს არის თანამედროვე დემოკრატიის მიდგომა, რომელსაც ინფორმირებული არჩევანი ეწოდება. მოსახლეობამ უნდა იცოდეს, ვინ აფინანსებს ამა თუ იმ არასამთავრობო ორგანიზაციას, მედიას და ამის შემდეგ გამოიტანს თავის გადაწყვეტილებას“, – განაცხადა სეფაშვილმა.
საპარლამენტო უმრავლესობის გადაწყვეტილებით, კანონპროექტი „უცხოური გავლენის გამჭვირვალობის შესახებ“ პარლამენტში ოფიციალურად დაინიცირდა. კანონპროექტში ნაცვლად ტერმინისა „უცხოური გავლენის აგენტი“ გამოყენებულია ტერმინი – „უცხოური ძალის ინტერესების გამტარებელი ორგანიზაცია“. კანონპროექტის ყველა სხვა ჩანაწერი უცვლელია.