ჩვენ უნდა გავითვალისწინოთ ყველა მეგობარი, დიდი სახელმწიფოს ინტერესი, მათი რჩევები, მაგრამ ახალი ცენტრალური კომიტეტები აქ არ გვჭირდება. ჩვენ იმისთვის ვიბრძოლეთ, რომ აქ ცენტრალური კომიტეტი აღარ იყოს, – ამის შესახებ პროფესორმა, ფილოსოფოსმა, ირაკლი ბათიაშვილმა გადაცემაში „იმედი LIVE“ განაცხადა, რომელმაც 9 აპრილის მოვლენები შეაფასა.
მისივე თქმით, ქვეყანაში მთავარ გამოწვევად ოკუპაცია რჩება.
„ჩვენთვის მიუღებელია ოკუპაცია, ეს არის მთავარი გამოწვევა. რუსეთის მიერ საქართველოს ტერიტორიების ოკუპაციას ქართველი ხალხი არასდროს შეეგუება. ნებისმიერი სხვა ტიპის მონობას ქართველი ხალხი არ შეეგუება. ახალი ცენტრალური კომიტეტები ჩვენ აქ არ გვჭირდება. ჩვენ უნდა გავითვალისწინოთ ყველა ჩვენი მეგობარი, დიდი სახელმწიფოს ინტერესი, მათი რჩევები, მაგრამ ჩვენ ახალი ცენტრალური კომიტეტები აქ არ გვჭირდება. ჩვენ იმისთვის ვიბრძოლეთ, რომ აქ ცენტრალური კომიტეტი აღარ იყოს“, – აღნიშნა ბათიაშვილმა.
მისივე თქმით, ერის მთელი ენერგია მიმართული უნდა იყოს ისეთ მთავარ პრობლემებზე, როგორიც არის ჩვენი დამოუკიდებლობის შენარჩუნება და განმტკიცება.
„მთელი ჩვენი კონცენტრაცია, ცნობიერების ენერგია უნდა მიემართოს ისევ და ისევ მთავარ პრობლემებზე, როგორიც არის ჩვენი დამოუკიდებლობის შენარჩუნება და განმტკიცება და რაც მთავარია, ჩვენი მთლიანობის აღდგენა, ვინაიდან ახლა უზარმაზარი გამოწვევებია და ჩვენ ამისთვის მომზადებული უნდა ვიყოთ“, – აღნიშნა ბათიაშვილმა.