საქართველოს პარლამენტის თავმჯდომარე შალვა პაპუაშვილი უზბეკეთის რესპუბლიკის პარლამენტის ოლი მეჯლისის საკანონმდებლო პალატის (ქვედა პალატა) თავმჯდომარე ნურდინჟონ ისმაილოვს შეხვდა.
პარლამენტის პრესსამსახურის ინფორმაციით, შეხვედრაზე ხაზი გაესვა საქართველოსა და უზბეკეთს შორის არსებულ მჭიდრო პოლიტიკურ-ეკონომიკურ კავშირებს.
შალვა პაპუაშვილმა მადლიერება გამოხატა უზბეკეთის მიერ საქართველოს ტერიტორიული მთლიანობის მტკიცე მხარდაჭერისთვის.
„შეხვედრაზე განიხილეს ორმხრივი ურთიერთობების საკითხები, მათ შორის თანამშრომლობა საკანონმდებლო ორგანოებს შორის, ასევე, ვაჭრობისა და ენერგეტიკის სექტორებში. ნურდინჟონ ისმაილოვის თქმით, საქართველოს პარლამენტარიზმის მდიდარი ისტორია აქვს. მხარეები შეთანხმდნენ, რომ ურთიერთთანამშრომლობის მემორანდუმის საფუძველზე გააღრმავებენ საპარლამენტო კავშირებს, მათ შორის კომიტეტებისა და მეგობრობის ჯგუფების დონეზე, ასევე, მჭიდროდ ითანამშრომლებენ საერთაშორისო საპარლამენტო პლატფორმებზე.
მხარეებმა აღნიშნეს, რომ წელს სრულდება საქართველოსა და უზბეკეთს შორის დიპლომატიური ურთიერთობების დამყარებიდან 30-ე წლისთავი და გამოხატეს არსებული ურთიერთობების გაღრმავების მზადყოფნა. ამ კუთხით, ხაზი გაესვა საქართველოში უზბეკეთის რესპუბლიკის საელჩოს გახსნის საკითხს“, – ნათქვამია პარლამენტის მიერ გავრცელებულ ინფორმაციაში.
მათივე ცნობით, შალვა პაპუაშვილმა უზბეკი კოლეგა საქართველოში მოიწვია.
შეხვედრა ცენტრალური აზიის რეგიონში შალვა პაპუაშვილისა და საპარლამენტო დელეგაციის ოფიციალური ვიზიტის ფარგლებში გაიმართა.
საპარლამენტო დელეგაციის შემადგენლობაში, რომელსაც საქართველოს პარლამენტის თავმჯდომარე შალვა პაპუაშვილი ხელმძღვანელობს, შედიან: ყაზახეთის რესპუბლიკის პარლამენტთან მეგობრობის ჯგუფის ხელმძღვანელი, რეგიონული პოლიტიკისა და თვითმმართველობის კომიტეტის თავმჯდომარე კახა კახიშვილი; თურქმენეთის პარლამენტთან მეგობრობის ჯგუფის ხელმძღვანელი, იურიდიულ საკითხთა კომიტეტის თავმჯდომარის პირველი მოადგილე დავით მათიკაშვილი; უზბეკეთის პარლამენტთან მეგობრობის ჯგუფის ხელმძღვანელი, კულტურის კომიტეტის თავმჯდომარის პირველი მოადგილე ირაკლი მეზურნიშვილი, პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილე ბაია კვიციანი; საფინანსო-საბიუჯეტო კომიტეტის წევრი ანტონ ობოლაშვილი; აგრარულ საკითხთა კომიტეტის წევრი სოზარ სუბარი.